Berisha: Akt i porositur nga familjet mafioze, për t’i mbyllur gojën gazetares
Ish- Kryeministri Sali Berisha deklaron se sulmi me armë ndaj banesës së prindërve të gazetares Klodiana Lala është një akt i porositur dhe i organizuar i familjeve mafioze. Sipas Berishës, breshëria e kallashnikovit drejt një banese ku ishin edhe fëmijët e gazetares, është një sulm terrorist dhe përbën diktatin e ri të mafies në vendin tonë. “Fallangat e krimit të narkoqeverisë së Noriegës ndërmorën një sulm të armatosur terrorist ndaj shtëpisë dhe prindërve të gazetares Klodiana Lala! Ky akt i porositur dhe organizuar nga familjet e mëdha mafioze të narkoqeverisë së Noriegës, përbën një përshkallëzim të ri tepër të rrezikshëm të diktatit të mafies qeveritare, përpjekjeve mafioze e kriminale të saj për t’i mbyllur gojën një gazetareje investigative, e cila po investigonte me guxim dhe vendosmëri mbi kokainën, krimin dhe trafiqet kriminale të niveleve më të larta të familjeve qeveritare mafioze, ndër të cilat edhe vet të Noriegës”, shkruan Berisha në reagimin e tij për ngjarjen. Duke dënuar me ashpërsi ngjarjen e ndodhur, Berisha paralajmëron Kryeministrin Rama se do të mbajë përgjegjësi të drejtpërdrejtë nëse gazetares Lala apo familjes së saj i ndodh ndonjë gjë. “Duke dënuar me ashpërsinë më të madhe këtë sulm të hapur, primitiv, mafioz e terrorist ndaj gazetares që po heton me vendosmëri lidhjet mafioze të organizatave kriminale me nivelet më të larta të narkoqeverisë shqiptare, le të paralajmërojmë të dashur miq Noriegën se vrimë miu nuk do gjesh të futesh dhe se fatin e diktatorit panamez do të pësosh, por jo nga marinsat e SHBA- së, por nga qytetarët dhe aleanca antikrim e Shqipërisë në rast se vazhdon me këto akte hakmarrjeje primitive ndaj Klodiana Lalës, familjes së saj apo çdo gazetari në këtë vend”, deklaron ish- Kryeministri Berisha.