Rama lutje për bashkiakët: Nxisni fermerët për investime në agroturizëm
Fond 75 milionë euro nga KE
Kryeministri Rama në një bilanc të shifrave të turizmit të sezonit që po mbyllet, ftoi kryebashkiakët që të punojnë në zonat e tyre për rritjen e agroturizmit.
Në një takim me të zgjedhurit vendorë dhe prefektet e qarqeve, Rama kërkoi nxitje të aplikimeve për të përfituar nga granti i qeverisë për të fuqizuar agroturizmin. “Do t’ju lutesha shumë e do t’ju përgjërohesha që të fokusoheni tek agroturizmi, sepse më lejoni t’ju them, është e pamundur, është e pajustifikueshme, është e papranueshme, që ndërkohë që potenciali për agroturizmin është kaq i madh e të ardhurat që agroturizmi sjell për njësitë vendore janë potencialisht kaq të mëdha, ne detyrohemi të shtyjmë, të anulojmë e të ripërsërisim thirrjen për aplikime, për agroturizëm, për të dhënë para, grant për familjet e për sipërmarrësit”, tha Kryeministri. Ai kujtoi se dhe Komisioni Europian jep fonde për zhvillimin e agroturizmit si një mundësi e mirë punësimi dhe zhvillimi ekonomik në fshat. “Ne jemi në dispozicion, pa dallim, nuk na intereson fare ngjyra politike. Na intereson vetëm kjo. Të mbështesim aplikimet në agroturizëm dhe kini parasysh që thirrja e dytë pati një përmirësim, por ndërkohë në vjeshtë hapet thirrja e programit të Komisionit Europian dhe kemi aty jo pak, por rreth 75 milionë euro nga të cilat 11 milionë euro janë vetëm për agroturizëm, për bujtina, për hotele turistike në fshat, ndërkohë që duhet t’ua përcillni njerëzve dhe faktin që ka një ndryshim, ka një paketë komplet të re fiskale për agroturizmin, është vetëm 6% TVSH- ja. Është vetëm 5% tatimfitimi. Nuk ka taksë për infrastrukturën, nuk ka taksë për pronën”, tha Rama. Nuk munguan dhe kritikat e Kryeministrit për të zgjedhurit vendorë të Partisë Demokratike. “Kryetarët e bashkive të PD- së nuk janë të pranishëm, ndërkohë që këtu flasim për një temë që është një temë e interesit të përbashkët, nuk ka pasur e nuk do ketë absolutisht asnjë ndarje në këtë aspekt të natyrës politike dhe shembulli i atij sipërmarrësit në Velipojë që tha shprehimisht se reduktimi i taksës nga 20% e TVSH- së në 6%, ka qenë një ndihmë shumë e madhe, por nga ana tjetër asnjë lopatë asfalt nuk ka për të, - është një kambanë për Bashkinë e Shkodrës, por secili mund të gjejë ose mund të dëgjojë kambana të tilla në të gjithë territorin”, tha Rama. Ai kërkoi nga kryebashkiakët që të shfrytëzohet çdo festë lokale, bashkie apo fshati për ta bërë tërheqëse zonën për turistët e huaj dhe ata vendas. “Kemi pasur rreth 500 aktivitete, por mund të kemi shumë më tepër dhe festat lokale, festat e fshatrave, festat e komuniteteve, sipas gjithë atyre elementëve të traditës mund të jenë shumë më tepër dhe ju takon ju t’i nxisni, t’i organizoni e pastaj të kërkoni dhe mbështetjen tonë, ne jemi të gatshëm. Por ajo që është më e rëndësishme është që festat janë një mundësi për komunitetet, për fermerët, për fshatin, për biznesin për të bërë para, për të shitur produktet e tyre te turistët. Ndërkohë edhe një element tjetër për të cilin duhet menduar sot për vitin e ardhshëm është krijimi edhe i eventeve tradicionale siç ka pa fund në Itali, në Francë, në Spanjën, në Portugali, në gjithë Mesdheun”, tha Rama.