I vdiq e motra, vëllai: Mjekët s’i ofruan ndihmë
Pas akuzës së vëllait, reagojnë mjekët: Piu mbidozë ilaçesh
Vdiq në Spitalin e Durrësit pasi mori mbidozë ilaçesh; vëllai akuzon mjekët për neglizhencë.
Ervehe Dedej u gjet nga familjarët e saj në gjendje të rënduar shëndetësore në një kanal. Pas dërgimit me urgjencë në spital, mjekët nuk kanë denjuar t’i japin ndihmën e shpejtë. Vëllai i 56vjeçares, Albert Dedej, pretendon se bluzat e bardha nuk kanë kryer misionin e tyre dhe për pasojë motra e tij ka ndërruar jetë në duart e tyre. Sipas tij, ngjarja ka ndodhur tri ditë më parë në urgjencën e Spitalit të Durrësit, ndërsa thotë se po të kishin ndërhyrë në kohë bluzat e bardha, motra e tij do të ishte gjallë. Alberti tregon se kishte shkuar në urgjencë pasi kishte kapërdirë një sasi medikamentesh dhe për tri orë me radhë nuk është vizituar nga mjeket. Sipas tij, bluzat e bardha nuk u angazhuan aspak në këtë rast, pasi motra e tij ishte bërë pis teksa ishte rrëzuar në një kanal në zonën e Porto- Romanos, ku edhe jetonte bashkë me nënën e saj të moshuar. “Jam një qytetar nga Durrësi që jetoj në Itali. Jam shumë, shumë i zhgënjyer me Spitalin e Durrësit. Tri ditë më parë kam humbur motrën në atë spital. Rreth tri orë kam qëndruar në urgjencë dhe motrës sime nuk i është dhënë asnjë shërbim. Asnjë mjek nuk afrohej, sepse ajo kishte rënë në një kanal dhe ishte bërë pis. Plaka u lutej mjekëve ma shpëtoni gocën. U shkoja mjekëve dhe i thosha hajde dhe vërini serumin. Nuk i gjejmë dot damarin, më thoshin. Pastaj më thonë se s’kemi çfarë t’i bëjmë. Një mjek më tha merreni dhe çojeni në shtëpi, se nuk kemi çfarë t’i bëjmë. Kërkoj mjekun e parë, ai më dërgon në një zyrë. Mjeku me telefon në dorë më thotë: Çfarë do? I them që motrën e kam në gjendje të rëndë. Nuk jam unë, po shko te dhoma tjetër se është filan mjek. Shkoj prap te X mjek, ai më thotë se e ka doktor Luti. I thashë ku ndodhet doktor Luti? Ka ik për një emergjencë jashtë më thanë”, shprehet i vëllai i Ervehe Dedej, e cila ndërroi jetë ketë të hënë në Spitalin e Durrësit. Krahas denoncimit publik, Dedej thotë se do bëjë denoncim edhe në Policinë e Dur- rësit me qëllim që të nisin hetimet për rastin në fjalë. “Këtu të sorollatin, duan vetëm lekë. Unë pyes për doktor Lutin dhe më thanë që është jashtë. Shkoj e gjej dhe i them që kam motrën, ajo që është helmuar. Ai më tha që nuk është helmuar. Në kohën që dr. Luti vjen, më thotë që mamaja jote më tha që e ka në kokë. Në kohën që ai shkon ta shikojë, më thotë që këtë nuk e shpëton as Zoti. I thashë unë nuk e kam çuar te zoti, e kam çuar në spital. Te Zoti do shkojë kur t’i vijë ora. Bëjnë një ndërhyrje të gjithë mjekët dhe unë i thashë që ky mjeku më tha që çojeni në shtëpi. Dr. Luti më tha që nuk ka ky urdhër që ta çosh në shtëpi, urdhrat i jap unë. I thashë po ti nuk ishe. Nuk shkoi 5 min, motra ime vdiq. Dua ta denoncoj si rast, pasi nuk dua që ndonjë tjetër person të ketë fatin e sime motre”, deklaron Dedej. Nga ana tjetër, mjekët deklarojnë se rasti është trajtuar me përkushtim maksimal, por, për fatin e keq, pacientja ka ndërruar jetë. Priten rezultatet e Mjekësisë Ligjore për të mësuar shkakun e vërtetë të vdekjes së 56- vjeçares, e cila, sipas të afërmve, është paraqitur e helmatisur nga medikamentet që kishte gëlltitur. Ndërkohë, Policia, nga ana e saj, ka nisur hetimet për zbardhjen e kësaj ngjarjeje të rëndë.