Bushiç supergol ndaj Luftëtarit, Partizani "cinik" me Kastriotin

Flamurtari i Ilir Dajës nuk ndalet, fiton në Gjirokastër dhe zhyt në krizë Luftëtarin. Një gol i Tomislav Bushiç në pjesën e parë mjaftoi për të marrë tri pikë në një transfertë delikate. Bluzinjtë konfirmuan momentin jo të mirë që po kalojnë, jo thjesht sportivisht, por mbi të gjitha edhe nga ana morale. Një skuadër e goditur psikologjikisht, që e kërkoi golin me të gjitha mënyrat, por nuk ishte e qetë para portës. Me lojën që u zhvillua, gjirokastritët meritonin të paktën barazimin, por vlonjatët nuk vodhën asgjë në fushë, pasi u treguan cinikë dhe arritën të administronin rezultatin në mënyrën më të mirë. Vasil Shkurtaj dhe Vladan Milosavljev u bënë protagonistë të rasteve flagrante të shpërdoruara, qoftë kur ndeshja ishte 0- 0, ashtu edhe kur shkoi 0- 1. Edhe vlonjatët gabuan jo pak, pasi i patën mundësitë të mbyllnin takimin më herë, për të mos qëndruar në ankth deri në fund. Musta goditi shtyllën, ndërsa Bushiç fali golin e dytë, por kjo edhe për meritë të portierit Ruçi, që ishte në një ditë të mirë. Fitorja në Gjirokastër e çon Flamurtarin në krye, duke u barazuar me pikë me Skënderbeun. Nga ana tjetër, Luftëtari i Millosh Kostiç mbetet në fund, duke konfirmuar një prej nisjeve më të errëta të historisë në elitë, me tri humbje në po kaq ndeshje në startin e kampionatit. Partizani- Kastrioti Partizani ka mposhtur me rezultatin 1- 0 Kastriotin në takimin e vlefshëm për javën e 3të të Kategorisë Superiore. Një gol i Asanit në minutën e 13- të i ka mjaftuar skuadrës së Gegës për të siguruar fitoren e radhës. Një fitore e vuajtur për "demat e kuq" të cilën e vunë në diskutim deri në minutat e fundit. Lila dhe Atsina për pak sa nuk barazuan re- zultatin në fundin e lojës, por pa arritur ta dërgojnë topin në rrjetë. Me triumfin minimal, Partizani ka shkuar në kuotën e 6 pikëve, ndërsa Kastrioti mbetet në kuotën e 3 pikëve. Ky takim u zhvillua në kryeqytet dhe pa praninë e tifozëve, për shkak të dënimit që ka marrë skuadra e Partizanit nga Komisioni i Disiplinës për shkak të ngjarjeve që ndodhën në Korçë. I pranishëm në tribunën VIP të këtij takimi ka qenë edhe trajneri i skuadrës Kombëtare, Kristian Panuçi. Për Partizanin është triumfi i dytë radhazi pas Kamzës, ndërkohë që Kastrioti regjistron humbjen e dytë radhazi në tri javët e para, pas nisjes me fitore në transfertën gjirokastrite. Sfidën e radhës kryeqytetasit do ta luajnë në transfertë ndaj Laçit, ndërkohë që Kastrioti do të udhëtojë drejt Kamzës.