SHBA e Gjermania, kundërshtare për paktin Kosovë- Serbi

Pas takimit të ministrave të Jashtëm të vendeve europiane dhe atyre të Ballkanit në Austri, u bë shumë e qartë se SHBA dhe Gjermania janë kundërshtare në lidhje me ndryshimin e kufijve mes Kosovës dhe Serbisë. Gazeta amerikane “Wall Street Journal” ka shkruar se qeveria gjermane ishte e shqetësuar për “ndryshimin e kufijve, një masë që mund të hapte Kutinë e Pandorës për konflikt ndëretnik në disa nga vendet më të varfra të rajonit”. Zyrtarët gjermanë mbeten shumë skeptikë për çështjen. “Ne nuk mendojmë se bisedimet mbi shkëmbimin e territorit midis Kosovës dhe Serbisë janë veçanërisht konstruktive. Kjo mund të hapë shumë plagë të vjetra në popullatën atje”, tha ministri i Jashtëm gjerman, Heiko Mass. Kancelarja gjermane më parë ka thënë se kufijtë e rajonit nuk ishin subjekt i ndryshimeve. Nga ana tjetër, këshilltari i Sigurisë Kombëtare të Shteteve të Bashkuara, John Bolton tha se kjo ide nuk i shqetësonte zyrtarët në Uashington, pavarësisht se vendet e tjera perëndimore ishin kundër kësaj zgjidhjeje për dy dekadat e fundit. Gazeta “WSJ” kujtoi se Uashingtoni dhe Berlini ishin në harmoni mbi qëndrimet e tyre në rajonin e Ballkanit që nga Presidenca Clinton dhe Marrëveshja e Dejtonit, deri kur Trump erdhi në detyrë dhe SHBA tregoi interes për të rishikuar politikën në rajon. Sipas “WSJ”, një marrëveshje e mundshme për korrigjimin e kufirit mund të përballet me kritika edhe nga popullatat e brendshme. Klerikët ortodoksë dhe politikanët kryesorë të Kosovës e kanë kundërshtuar atë. Zyrtarët në Bosnjën fqinje janë të shqetësuar se kjo ide mund të nxisë më tej Presidentin e Republika Srpska për të kërkuar pavarësinë. Disa udhëheqës të BE- së ishin të shqetësuar mbi faktin se marrëveshja për korrigjimin e kufirit mund të shkaktonte një ndarje etnike edhe në Maqedoni, duke marrë parasysh rastet e mëparshme të dhunës, ku përfshihej pakica shqiptare. Institucionet e BE- së pas takimit joformal të ministrave të Jashtëm kanë shfaqur shpresë për një përparim të rëndësishëm në integrimet e Ballkanit Perëndimor, pavarësisht ankthit rreth idesë së shkëmbimit të tokës në baza etnike. Një marrëveshje e tillë mund të nxisë pretendime mbi ndarje në baza etnike edhe në Maqedoni, Bosnje- Hercegovinë dhe Kroaci dhe të provokojë tensione 20 vite pas përfundimit të luftërave në Ballkan.