SPAHO: RAMA MBAN NËN SQETULLA PËRFAQËSUESIT E BOTËS SË KRIMIT

Në emër të opozitës, kreu i Grupit të PD- së ka ngritur si shqetësim ngjarjet kriminale të ndodhura në qytetet kryesore të vendit, si dhe sulmin ndaj gazetares Klodiana Lala. Këtë qëndrim Spaho e ka pohuar dhe për mediat pas përfundimit të Konferencës së Kryetarëve. “Ngrita shqetësimin për gjendjen kriminale në vend, shtrirjen e krimit në qytetet kryesore të vendit, marrjen e pushtetit absolut në Elbasan, Shkodër, Vlorë, Durrës dhe qytete të tjera si dhe kriminalizimin e qeverisjes, pasi kjo gjendje është rezultat i një qeverisje të kriminalizuar. Solla në vëmendje edhe sulmin ndaj gazetares Klodiana Lala, që është pika kulmore e asaj politike konstante që ka ndjekur Kryeministri Rama në denigrimin, poshtërimin, luftën e ashpër që ka ushtruar gjithmonë ndaj përfaqësuesve të medias, shtypit, që nuk kanë qenë në unison me qëndrimet e tij politike. Është kjo përkëdhelje koke dhe mbajtje nën sqetull që u bën ai përfaqësuesve të botës së krimit, që çon në ngjarje të tilla”, tha dje Spaho. Më tej, demokrati tha se skandaloze ishin dhe ngjarjet e denoncuara gjatë verës, si lidhjet e Taulant Ballës me biznesmenin e dënuar dhe përgjimet e deputetit të PS, Jurgis Çyrbja.” Solla në vëmendje rastet e freskëta të krimit në qeverisje dhe legjislativ. Solla në vëmendje kryetarin e Grupit Parlamentar të PS, Taulant Balla, që ka lidhje familjare me një person të dënuar me 21 vjet burg për krijim organizatash kriminale dhe trafik ndërkombëtar droge. Tërhoqa vëmendjen për Jurgis Çyrbjen, deputet në maxhorancë, që komunikon me përfaqësues të bandës së Shullazit, sikurse rasti që përmenda më herët, i cili ka të bëjë me Aldo Baren”, tha ai.