Rama me mësuesit: Do ju rrisim sërish pagat
“Nuk ju kemi harruar, rrogat tuaja kanë nevojë për më shumë rritje”
Dy javë përpara se të nisë viti i ri shkollor, Kryeministri Edi Rama, bashkë me ministren përgjegjëse për Arsimin, zhvilloi një takim me mësuesit për t’iu komunikuar një varg nismash që janë marrë për këtë vit e ato që do të ndërmerren.
Përpos masës për tekstet falas, rritjes së cilësisë së tyre e shtimit të mësuesve për fëmijët me aftësi të veçanta, kreu i qeverisë iu premtoi arsimtarëve një tjetër rritje pagash brenda këtij mandati, me mundësinë e parë që do t’i krijohet qeverisë. “Nuk e kemi harruar që edhe pse janë rritur, rrogat tuaja kanë nevojë për më shumë rritje, këtë nuk e kemi harruar, kështu që thjesht për t’ju thënë që të mos e kini këtë dyshim, por çdo hap, sipas mundësive të reja që krijohen, dhe besoj që do kemi mundësi të reja dhe në këtë aspekt së shpejti”.
TEKSTET FALAS Numri një i qeverisë mblodhi takimin e një dite më parë për të komunikuar vendimin e marrë më herët nga Këshilli i Ministrave për tekstet shkollore falas nga klasa e parë në të katërtën. Në vitin pasues do të përfshihet edhe klasa e pestë, duke përmbyllur kështu ciklin e ulët, ndërsa ambicia e qeverisë është që brenda mandatit të gjithë nxënësit e arsimit të detyrueshëm të mund t’i marrin tekstet pa pagesë. “Vitin e ardhshëm, në këtë program do të përfshihet dhe klasa e pestë dhe ambicia jonë është që deri në fund të këtij mandati, i gjithë arsimi i detyrueshëm, pra, deri në klasën e nëntë, të mbulohet me libra shkollorë falas dhe prindërve, familjeve të të gjithë nxënësve nga klasa e parë në të nëntën, t’u kursehen miliona e miliona euro shpenzime për libra, që i mbeten familjes për buxhetin e saj”, tha Rama në takimin me mësuesit. Por, sipas tij, më e rëndësishme është që ky proces të përmbyllet në kohë, përpara datës së parë të fillimit të shkollës, 17 shtator. “Është shumë e rëndësishme që i gjithë komuniteti i arsimit, që nga Ministria e Arsimit te drejtoritë, të cilat edhe ato tani do të hyjnë në një fazë reformimi, te drejtoritë e shkollave dhe te mësuesit, të bëjmë detyrën për t’i dhënë në kohë të gjithë librat falas për fëmijët”. Fatura financiare e mbulimit të teksteve pa pagesë për katër klasat e arsimit fillor është 6 milionë dollarë. Sipas kreut të qeverisë, vitin e shkuar ishin jo pak, por 108 mijë fëmijë të kategorive të ndryshme që janë rimbursuar për librat shkollorë. ÇMIMI I LIBRAVE Rritja e cilësisë së teksteve, me të cilat do të mësojnë nxënësit nga ky vit e tutje, është shoqëruar dhe me një çmim më të kripur. Këtë e pranoi edhe Kryeministri, sipas të cilit nuk ka asnjë anomali me çmimet në vendet analoge. Për më tepër, e njëjta faturë financiare do të rëndojë mbi qeverinë pas rritjes së klasave përfituese të teksteve falas. “Sot, ne mbyllim ciklin e ni- sur nga ministrja për zëvendësimin e librave skarco me libra të Cambdridge, të Oxford dhe të Pearson. Libra të një cilësie të padiskutueshme dhe janë këto libra që sot jepen falas, pra, edhe cilësia edhe lehtësimi për klasën e parë deri në të katërtën këtë vit. Disa thonë që janë shtrenjtuar. Po, disa libra janë pak më të shtrenjtë sesa ishin, sepse janë produkte shumë më cilësore dhe nëse do të bëjmë krahasimin në çmim me vendet e tjera, do të shikojmë që nuk ka asgjë anormale”, nënvizon Rama.