Zhbllokohet ngërçi me KLGJ- në, kandidojnë dy gjyqtarë Apeli
Në një kohë kur vetingu ka përfunduar për kandidatët për Këshillin e Lartë të Gjyqësorit, i cili është organ përcaktues për krijimin e institucioneve të reja dhe mbushjen e boshllëqeve në Gjykatën Kushtetuese dhe atë të Lartë, krijimi i këtij institucioni mbahej "peng" në një farë mënyrë vetëm nga një kandidat prej gjykatave të Apelit në rrethe. Kjo, pasi Komisioni i Pavarur i Kualifikimit shkarkoi të vetmin kandidat nga Apeli i rretheve, gjyqtarin Besim Trezhnjeva.
Këshilli i Emërimeve në Drejtësi dhe Gjykata e Lartë shpallën vakancën, por vetëm kur mbeten 24 orë nga përfundimi i afatit të aplikimit, kanë mbërritur dy kandidatura nga dy gjyqtarë Apeli në rrethe. Këto kandidatura do të shqyrtohen dhe më pas do t'i nënshtrohen vetingut dhe nëse njëri prej tyre kalon, atëherë KLGJ- ja do të ngrihet dhe ngërçi me dy gjykatat më të larta të vendit mund të zgjidhet. Emrat e dy kandidatëve do të bëhen publike vetëm pasi të përfundoi edhe afati i aplikimit. Nga kandidatët për KLGJ, vetëm katër u shkarkuan nga ana e Komisionit të Pavarur të Kualifikimit, pasi kanë pa- sur probleme me pasurinë. Ata janë: Artan Laze dhe Bledar Abdullai nga Gjykata e Tiranës, Artan Zeneli nga Gjykata e Lartë dhe Besim Trezhnjeva nga Gjykata e Apelit Durrës. Gjithashtu, para nisjes së procesit u dorëhoq Brunilda Kasmi e Gjykatës së Tiranës. Megjithatë, kandidatët që kaluan vetingun i plotësojnë vakancat sipas ligjit, por mungon një gjyqtar nga Apeli i rretheve. Kështu, kemi katër gjyqtarë nga Gjykata e Tiranës, që janë: Alma Brati, Astrit Faqoilli, Brunilda Kadi dhe Manjola Xhaxho; një nga Krimet e Rënda, Dritan Hallunaj; një nga Apeli i Krimeve të Rënda, Nerina Kosova; nga Gjykata e Lartë është Medi Bici; nga Apeli i Tiranës Ilir Toska dhe nga Gjykata e Rrethit, Marçela Shehu e Kurbinit.