Nisin punimet në Gjirokastër- Lazarat, ARRSH: Devijohet trafiku
Nisin sot punimet për rehabilitimin e dy akseve, Gjirokastër- Lazarat dhe Melgushe- Mjedë. Sipas Autoriteti Rrugor Shqiptar, në kuadër të projektit "Mirëmbajtja dhe Siguria Rrugore bazuar në Rezultate", ndërhyrja për rehabilitimin e këtyre dy akseve do të nisë në orën 07: 00. Punimet parashikohen të realizohen sipas grafikut të punimeve të miratuara. Nga ana e Autoritetit Rrugor Shqiptar dhe Policisë së Qarkullimit Rrugor është hartuar një plan operacional i ndërhyrjes për të garantuar mbarëvajtjen e punës në terren, si dhe është hartuar një plan operacional i ndërhyrjes dhe devijimit të trafikut për të shmangur bllokimin e qarkullimit dhe garantuar mbarëvajtjen e punës në terren. "Ndërhyrja do të kryhet me segmente të pjesshme dhe lëvizja e mjeteve do të kryhet në një korsi, në mënyrë të lejimit të qarkullimit normal për automjetet. Punonjësit e Autoritetit Rrugor Shqiptar, Policisë së Qarkullimit Rrugor dhe kontraktorit të mirëmbajtjes do të jenë në terren për mbarëvajtjen e ndërhyrjes dhe orientimin e trafikut. ARRSH dhe Policia e Qarkullimit Rrugor kërkojnë mirëkuptimin dhe bashkëpunimin e drejtuesve të mjeteve gjatë procesit të rehabilitimit në këtë aks rrugor dhe respektimin në mënyrë rigoroze të sinjalistikës provizore të vendosur si dhe udhëzimet e Policisë Rrugore në terren", sqaroi Autoriteti Rrugor Shqiptar. Sipas ARRSH- së, në aksin Gjirokastër- Lazarat ndërhyrjet do të kryhen në 3.4 kilometra, ndërsa në aksin Melgushe- Mjedë në 7 kilometra.