Kufijtë e Kosovës, Meta takon Thaçin në Durrës
"Me rëndësi, dialogu dhe marrëdhëniet Kosovë- Serbi"
Kreu i shtetit është takuar dje në Durrës me Presidentin e Kosovës, Hashim Thaçi, me të cilin ka diskutuar dhe për çështjen e nxehtë, atë të negocimit të kufijve mes Kosovës dhe Serbisë.
Zhvillimin e takimit e ka bërë të ditur Presidenti Meta, teksa ka postuar një fotografi me Thaçin në një prej restoranteve në zonën e Currilave në Durrës. Meta ka thënë se Kosova duhet të vazhdojë dializën për normalizimin e marrëdhënieve me Serbinë në mënyrë që të dy palët të garantojnë njohje reciproke mes dy vendeve. Për Metën, stabiliteti rajonal dhe perspektiva europiane është prioritet i përbashkët. "Kënaqësi të takohesha sot në Durrës për një drekë pune me Presidentin e Republikës së Kosovës, z. Hashim Thaçi. Rritja e mëtejshme e shkëmbimeve të gjithanshme midis dy vendeve është një prioritet i përbashkët. Forcimi i stabi- litetit rajonal dhe perspektivës europiane të rajonit është qëllim i përbashkët. Ndaj, është me rëndësi vazhdimi i dialogut për normalizimin përfundimtar të marrëdhënieve Kosovë- Serbi, që do të garantojë jo vetëm njohje reciproke midis dy vendeve si edhe të ardhmen e tyre në BE, por dhe një bashkëjetesë të përhershme midis shqiptarëve e serbëve në interes të gjeneratave të ardhshme", shkruan Presidenti Meta. Ndërkohë që dy ditë më parë Meta është takuar dhe me liderin e Vetëvendosjes, Albin Kurti. Për takimin me Kurtin, Meta nuk ka dhënë ndonjë deklaratë, por vetëm vendndodhjen që ishte në plazhin e Karpenit. "Kënaqë- si të takohesha me liderin e Vetëvendosjes, z. Albin Kurti, në Karpen", shkruan Presidenti. Më herët, Presidenti ka folur për negocimin e një marrëveshjeje mes Kosovës dhe Serbisë. "Çdo diskutim dhe debat që ndihmon në kuptimin dhe pranimin e këtij realiteti është i mirëpritur. Çdo devijim nga ky realitet, përveçse provokon emocione dhe retorika populiste, nuk sjell dobi. E kaluara historike e Ballkanit është fatkeqësisht e lidhur me ndryshime kufijsh, spastrim etnik dhe shpërngulje të dhun- shme të popullsive, të cilat janë shoqëruar me probleme të mëdha, armiqësi, luftëra e urrejtje. Marrëveshja, që mendohet të arrihet sot mes palëve, është e rëndësishme të çlirojë energji pozitive, të ndihmojë frymën e bashkëjetesës dhe harmonisë dhe të shërojë ndjenjën e urrejtjes të mbjellë nga e kaluara dhe historia", ka thënë Meta.