“Gati për një draft që shpëton politikën nga shpërdoruesit e besimit”

Partia Socialiste dhe të mandatuarit e Kryeministrit Rama do të nisin sot bisedimet me PD- në për projektligjin e vetingut në politikë. Në një prononcim për "Panorama", kryetarja e Komisionit të Sigurisë në Kuvend, Ermonela Felaj, thekson se maxhoranca është e gatshme të diskutojë për një draft të plotë që do të shpëtojë politikën nga ata që kanë shpërdoruar besimin e publikut. "Besoj kemi qenë të qartë në qëndrimin tonë. Ne jemi të gatshëm për të diskutuar mbi një draft të plotë, i cili e shpëton politikëbërjen nga të gjithë shpërdoruesit e besimit publik, pa asnjë përjashtim", deklaron Felaj. Burime të "Panorama" bëjnë me dije se kreu i Grupit Parlamentar, Taulant Balla, do të ketë kontakte me kreun e Grupit të PD, Emdond Spaho, lidhur me propozimin e demokratëve. Balla është mandatuar nga Kryeministri për të folur lidhur me këtë nisëm të demokratëve, për të cilën kreu i qeverisë është shprehur se është i gatshëm ta diskutojë dhe ta kalojë në Parlament. Por nënkryetari i Grupit Parlamentar të PD, Oerd Bylykbashi, sqaroi për "Panorama", se vetingu në politikë është seria e dytë e dekriminalizimit të politikës, e cila lindi si nevojë për shkak se kriminelët në Parlament u zëvendësuan me të deleguarit e tyre. "Ky ligj është faza e dytë e dekriminalizimit. Dekriminalizimi është veting. Përmes atij ligji u nxorën jashtë Parlamentit të gjithë ata ligjvënës që kishin dënime penale, por, ndërkohë, përballë situatës kur Kryeministri ata kriminelë i zëvendësoi me të komanduarit e tyre në Parlament, lind nevoja për veting në politikë. Qëllimi i ligjit të dekriminalizimit në kohën kur u miratua dhe i këtij ligji që ne po propozojmë, është mbrojtja e institucioneve demokratike nga influenca e politikanëve të lidhur me krimin në vendimmarrje dhe politikëbërjen e institucioneve. Vetingu në politikë duhet të kuptojmë që nuk është drejtësi. Është akt administrativ, veprim pastrimi. Objektivi i ligjit është që të largojë çdo politikan të lidhur me krimin", deklaroi Bylykbashi për "Panorama".