Skandali CEZ – DIA, Ismailaj kërkon pafajësi në Gjykatën e Lartë
TIRANE – Pesë muaj pasi Gjykata e Apelit la në fuqi dënimin me 11 vjet heqje lirie për ish- administratorin e kompanisë DIA, Kastriot Ismailaj, ky i fundit nuk heq dorë nga kërkesa e tij për pafajësi. Së fundmi, Ismailaj i është drejtuar Gjykatës së Lartë. Kërkesa e tij është depozituar më 12 korrik, por ende nuk është vendosur data se kur do të mblidhet Kolegji Penal për shqyrtimin e saj. Relator i kësaj kërkesë është përzgjedhur gjyqtari Edmond Islamaj, i cili kaloi me sukses procesin e vetingut. Aktualisht, Gjykata e Lartë ndodhet në pamundësi të formimit të trupës gjykuese dhe kërkesa e Ismailajt do të mbetet në pritje si mijëra kërkesa të tjera deri në plotësimin e vakancave në Gjykatën e Lartë. Më 8 maj të këtij viti, Gjykata Apelit të Tiranës ka lënë në fuqi vendimin e dënimit të Kastriot Ismailaj me 11 vite burg, për skandalin CEZ- DIA. Avokati mbrojtës i Ismailajt ankimoi në Apel vendimin e Shkallës së Parë i marrë në tetor të vitit të kaluar. Ai u dënua për dy akuza, “mashtrim me pasoja të rënda” dhe “pastrim parash” në mbledhjen e borxheve të prapambetura të rrjetit të shpërndarjes CEZ. Ismailaj u akuzua nga Prokuroria se është paguar nga kompania CEZ, plot 6.5 milionë dollarë, për një shërbim të cilin ajo nuk e kishte kryer. Sipas hetimeve, DIA nuk kishte kryer asnjë punë për mbledhjen e parave, por borxhet ishin mbledhur nga vetë administrata e CEZ. Ndërsa nga ana tjetër, paratë e parashikuara në kontratë, i janë kaluar DIA- s nga kompania CEZ për një punë të pakryer. Më 25 tetor të vitit të kaluar, kur vetë Ismailaj kërkoi që të rihapej hetimi, me pretendimin se dispononte 100 prova të reja, Gjykata e Tiranës e dënoi me 11 vjet burg, në një kohë që Prokuroria kishte kërkuar 15 vite heqje lirie. Nga ana tjetër, togat e zeza vendosën edhe sekuestrimin e një shume të madhe që llogaritet në miliona dollarë. Vendimi u dha pas një seance maratonë, që zgjati një vit e gjysmë. Ndërkohë janë sekuestruar dhe kanë kaluar në llogari të shtetit, 4 llogari. Përkatësisht, 3 milionë dollarë, 451 mijë euro, 939 mijë dollarë dhe 12 milionë lekë të rinj.