Ambasadorja gjermane për vrasjet: Përmirësoni punën
Reagimi i Schutz në Shkodër: Prokuroria e Policia t’i zbulojnë
Prokuroria dhe Policia do të duhet të përmirësojnë punën e tyre sa u përket hetimeve të rasteve të konstatuara. Shpresojmë që të ketë edhe bashkëpunim me ndërkombëtarët...
Nga Shkodra, ambasadorja e Gjermanisë në Shqipëri, Sussane Schutz, deklaroi se Prokuroria dhe Policia duhet që të përmirësojnë punën e tyre sa i përket zbulimit të kriminalitetit.
Ambasadorja iu përgjigj interesit të gazetarëve pas një aktiviteti për bashkëpunimin 30- vjeçar GIZ- Shqipëri. E pyetur nëse ndjehet e shqetësuar për situatën kriminale të kohëve të fundit në Shqipëri ku vetëm në Shkodër janë shënuar 6 vrasje dhe dy të zhdukur brenda 3 muajsh, ambasadorja u tregua kritike për policinë dhe prokurorinë shqiptare duke dhënë mesazhin e saj se duhet ta përmirësojnë punën e tyre sa i përket zbulueshmërisë së ngjarjeve të rënda që kanë tronditur vendin. “Shqipëria ka shënuar përmirësimet e veta në këtë fushë, por duhet të bëjë edhe më shumë në luftën kundër krimit të organizuar. Ka pasur zhvillime pozitive deri diku, por të gjitha përpjekjet duhet të vijojnë edhe më tej. Prokuroria dhe Policia do të duhet të përmirësojnë punën e tyre sa u përket hetimeve të rasteve të konstatuara. Shpresojmë që të ketë edhe bashkëpunim me ndërkombëtarët për të in- tensifikuar edhe më tej punën”, u shpreh ambasadorja. Schutz dha një përgjigje edhe për sa i përket anëtarësimit të Shqipërisë në Bashkimin Europian. Ajo deklaroi se pesë prioritetet e parealizuara duhet që të plotësohen deri në qershorin e ardhshëm, duke vënë theksin kryesisht te krimi i organizuar dhe korrupsioni. Më tej, ambasadorja gjermane ishte kritike edhe përsa i përket procesit të vetingut në Shqipëri. “Në lidhje me vetingun në drejtësi, jemi të mendimit që ky është një proces në vijim që ka sjellë sukseset e para, por duhet të vijojë në të ardhmen për të dhënë rezultatet konkrete. Ky proces duhet të zhvillohet në mënyrë të pa- varur dhe të gjitha vendet vakante në sistemin e gjykatave dhe prokurorive të mund të përmbushen sa më shpejt, sidomos në lidhje me Gjykatën Kushtetuese”, përfundoi ambasadorja gjermane.