Statusi i pronës, verifikimet do të bëhen online
Pjetri: Shkurtohet koha e shërbimit ndaj qytetarëve
Për të marrë informacion mbi statusin juridik të çdo prone, përmbaruesit shtetërorë nuk do ta kenë më të nevojshme t’i drejtohen me shkresë Hipotekës. Në sajë të një marrëveshjeje të firmosur nga Kryeregjistruesi Valdrin Pjetri dhe Drejtori i Përgjithshëm i Përmbarimit, Pirro Lutaj, janë sheshuar të gjitha burokracitë e deritanishme, duke bërë të mundur që verifikimet të bëhen përmes sistemit online. Një praktikë e tillë do të kërkojë më pak kohë, duke ndihmuar në përmirësimin e shërbimit ndaj qytetarëve. Një gjë e tillë u vu në dukje edhe nga Kryeregjistruesi Pjetri.
“Nënshkruajmë këtë marrëveshje bashkëpunimi me Përmbarimin Gjyqësor Shtetëror, nëpërmjet së cilës përmbarimi do të ketë akses online në regjistrat tanë hipotekorë. Përmbarimit shtetëror nuk do t’i duhet më të dërgojë shkresa dhe të humbasë kohë për të marrë informacion mbi statusin juridik të pasurive, duke shkurtuar kohën e shërbimit ndaj qytetarëve”.
Nga ana e tij, Drejtori i Përgjithshëm i Përmbarimit Lutaj vlerësoi marrëveshjen e bashkëpunimit, pasi, sipas tij, shkurtohen procedurat dhe koha e dhënies së shërbimit nga ana e përmbarimit.
“Përmes nënshkrimit të kësaj marrëveshjeje lehtësohen kontaktet me ZRPP në të gjithë territorin, pasi edhe zyrat përmba- rimore në të gjithë territorin do të kryejnë më shpejt veprimet procedurale e ligjore për të përshpejtuar ekzekutimin e titujve ekzekutivë. Pra, është një procedurë që u vjen në ndihmë qytetarëve, të cilëve u shkurtohet koha e marrjes së shërbimit përmes këtij bashkëpunimi online mes dy institucioneve”, u shpreh Drejtori i Përgjithshëm i Përmbarimit. Praktika e deritanishme parashikonte që përmbaruesit shtetërorë të njiheshin me statusin e çdo prone përmes korrespondencës me institucionin e Hipotekës. Shkëmbimi i shkresave kërkonte kohë, duke sjellë vonesa në ekzekutimin e titujve të pronësisë. Por duke nisur nga sot, nuk do të jetë më e nevojshme ndjekja e kësaj procedure. Pakti iu mundëson përmbaruesve akses në hartat e Hipotekës, duke marrë informacion për statusin e çdo prone.