Haradinaj e Veseli, kundër ndryshimit të kufijve
Ambasadori i SHBA- së në Beograd, Kyle Scott, tha se për arritjen e një marrëveshjeje përfundimtare ndërmjet Kosovës dhe Serbisë nevojitet një mbështetje nga fuqitë e mëdha. “Mendoj se një marrëveshje ndërmjet Serbisë dhe Kosovës është ende e mundur dhe shpresoj se liderët e rajonit do ta mbështesin këtë, sepse ne e kemi mundësinë për të ndërtuar marrëveshje për paqe dhe stabilitet” tha Scott, duke shtuar se Beogradi dhe Prishtina duhet ta arrijnë një marrëveshje e cila do të jetë e përhershme. Ai ka thënë se një mbështetje nga SHBAtë, Rusia dhe Gjermania do të ishte e nevojshme për implementimin e një marrëveshjeje, por thekson se puna kryesore duhet të bëhet nga Prishtina dhe Beogradi.
Kryeministri i Kosovës, Ramush Haradinaj, duke mbrojtur qëndrimin e tij kundër ndryshimit të kufijve, tha në lidhje me Preshevën se: “Ne do ta mbajmë vëmendjen gjithmonë atje, sa u përket këtyre temave është zbatimi i Kushtetutës së vendit, ajo na obligon në territor edhe në kufi. Unë mbaj pozicion të rezervuar për gjëra të tjera, i përmbahem Kushtetutës së vendit. Është eksperiment i rrezikshëm loja me kufijtë”. Edhe Kryetari i Kuvendit të Kosovës, Kadri Veseli, tha të martën se sovraniteti i Kosovës është i pacenueshëm. “Ujmani do të jetë Kosovë, sovraniteti i Republikës së Kosovës është i pacenueshëm. Ne nuk kemi pretendime territoriale ndaj askujt. Ne do të sillemi mirë, në partneritet, në fqinjësi të mirë. Në të njëjtën kohë do të vazhdojmë me partnerët tanë SHBA, Britania e Madhe dhe veçanërisht Bashkimin Europian, sepse ajo është shtëpia jonë”, tha Veseli.
Presidenti i Serbisë, Aleksandar Vuçiç, pas takimit në Beograd me Ron Johnson, senatori amerikan, i cili kryeson Komitetin e Senatit për Sigurinë dhe Çështjet Qeveritare, pohoi se nuk mund të ketë zgjidhje me Kosovën pa u miratuar nga fuqitë e mëdha. Vuçiç tha se “Johnson gjithmonë donte të dëgjonte atë që serbët mendonin dhe ka lobuar për paqen në Ballkan, si dhe u përpoq të kontribuonte në krijimin e një zgjidhjeje kompromisi midis serbëve dhe shqiptarëve, Beogradit dhe Prishtinës nëpërmjet autoritetit, njohurive dhe pranisë së tij”. Duke iu përgjigjur pyetjeve të gazetarëve rreth arritjes së një marrëveshjeje midis Beogradit dhe Prishtinës, Vuçiç tha: “Nuk mendoj se ekziston një zgjidhje qoftë pa Shtetet e Bashkuara, apo pa Gjermaninë apo Rusinë. Çdo marrëveshje është e vështirë, shumë e vështirë, pothuajse e pamundur, por ne duhet të bëjmë më të mirën. Nëse diçka e tillë do të ndodhte me çdo rast, do të ishte shumë e rëndësishme që të gjitha fuqitë e mëdha ta mbështesnin atë. Mendoj se fuqitë e mëdha duhet, para së gjithash, të japin shtysë për bisedimet”. Ai theksoi se: “Rusia ka qenë gjithmonë në anën tonë, në anën e së drejtës ndërkombëtare, ashtu si Shtetet e Bash- kuara dhe Gjermania mendonin se ishin në anën e së drejtës ndërkombëtare kur ishte fjala për njohjen e Kosovës. Prandaj ne kemi nevojë për një zgjidhje që do të linte të dyja palët njëlloj të pakënaqura ose të paktën pak të kënaqura”, përfundoi Vuçiç. Ron Johnson u tha gazetarëve se vendi i tij nuk do të impononte ndonjë zgjidhje për Kosovën dhe se si Presidenti i SHBA, Donald Trump, edhe zëvendësi i tij, Mike Pence, donin që problemi i Kosovës të zgjidhet. “Populli amerikan dëshiron që Serbia të jetë e suksesshme, ne dëshirojmë paqe dhe siguri, dëshirojmë një situatë të qëndrueshme, dëshirojmë prosperitet dhe nuk do të imponojmë asnjë zgjidhje për Kosovën, duke i dhënë Presidentit Vuçiç hapësirë për të gjetur një zgjidhje fleksibile. Ju keni një udhëheqës të guximshëm, ai dëshiron më të mirën për popullin e tij, unë do të jap maksimumin për të mbështetur popujt në Serbi dhe Kosovë, të cilët dëshirojnë paqe dhe stabilitet”, tha Johnson pas takimit të tij me Vuçiç. Johnson tha se kishte gjithmonë një mundësi që Presidenti i SHBA, Donald Trump, të vizitonte Serbinë.