PD: Propozimi i Ramës, tentativë për zvarritje, Venecia është shprehur
Partia Demokratike e sheh si manovër për të zvarritur vetingun e politikanëve, kërkesën e Kryeministrit Rama për t’iu drejtuar për opinion Komisionit të Venecias. Deputeti i PD- së, Oerd Bylykbashi, deklaroi dje se propozimi i demokratëve është realizuar pikë për pikë me vetingun e gjyqtarëve dhe prokurorëve, për të cilët Komisioni i Venecias është shprehur dy herë pozitivisht. “Fakti që ne kemi zgjedhur që të përdorim pikë për pikë tekstin e Kushtetutës për vetingun e krimit të gjyqtarëve dhe prokurorëve dhe ky tekst ka marrë një vlerësim nga Komisioni i Venecias. Faktikisht, është një fazë e dytë e dekriminalizimit. Edhe për dekriminalizimin, Komisioni i Venecias është shprehur në favor të largimit të personave të lidhur me krimin. Pra, ka marrë dy herë përgjigje pozitive, në favor të kësaj që propozojmë ne. Nuk bën gjë tjetër, veçse tregon se zoti Rama ka vetëm merakun që kjo të mos bëhet”, u shpreh për “Klan” juristi i PD- së. Maxhoranca pretendon se drafti i opozitës dublon Byronë Kombëtare të Hetimit dhe Prokurorinë Speciale, por Bylykbashi edhe për këtë rast e ka një përgjigje.
“Asgjë nuk pengon sot që korrupsioni i zyrtarëve publikë, deputetë, ministra, gjyqtarë, të hetohet, të dënohet dhe pasuritë e vëna me korrupsion të merren sot nga shteti, të konfiskohen. Ne kemi miratuar diçka më shumë kaq. Në 2016- n, ne krijuam SPAK dhe Byronë Kombëtare të Hetimit, të gjitha këto në Kushtetutë. Pra, t’i hetojmë, t’i dënojmë dhe t’u marrim pasuritë!”, thekson deputeti Bylykbashi. Deputeti i PD- së sqaron se koncepti sesi do të bëhet ky proces, është i gatshëm në ligjin e vetingut për gjyqtarët e prokurorët, ndërsa organet që do ta bëjnë atë janë të përcaktuara në ligjin për dekriminalizimin. “Në të njëjtën formë siç bëhet për gjyqtarët dhe prokurorët. Nëse është e nevojshme, të vendosen instrumente dhe procedura shtesë, është e thjeshtë, do bëhen edhe këto. Por është vetëm çështje disa rregullash shtesë. Modeli ekziston sot. Ndërkohë, po aq kemi një pistë të hapur për mënyrën sesi funksionojnë institucionet, që pastrojnë krimin nga institucionet demokratike, që është i njëjtë me dekriminalizimin”, është shprehur ai.