Vetingu në politikë, Ruçi: Më ndalohet të tregoj votën
“Do të gjykohet dhe do të vendoset në kohën dhe në momentin e duhur”
Kryetari i Parlamentit, Gramoz Ruçi, ka folur dje për propozimin e depozituar nga opozita për realizimin e vetingut të politikanëve.
Nga qyteti i Fierit, kreu i Parlamentit bëri të ditur se brenda dy javëve do të nisë shqyrtimi i ndryshimeve kushtetuese. Ai bëri të ditur se nisma e demokratëve ka hyrë në procedurat parlamentare dhe do të nisë të shqyrtohet nga strukturat e vendit. Ruçi tha se do të zhvillojë mbledhjen e Këshillit të Legjislacionit dhe Komisionit të Ligjeve, ku do të bëhet dhe prezantimi i parë i vetingut të politikanëve. “Ka ditë që ky draft është paraqitur në Kuvendin e Shqipërisë. Sipas procedurave parlamentare, dje ka qenë afati për të njoftuar seancën e Parlamentit. Drafti është përfshirë në programin e Parlamentit, iu është vënë në dispozicion deputetëve dhe është botuar në faqen e internetit të Kuvendit të Shqipërisë. Brenda dy javësh nga data e depozitimit, do të mblidhet Këshilli i Legjislacionit dhe Komisioni i Ligjeve, të cilët do të bëjë një program për njohjen dhe diskutimin për materialin. Pastaj, Këshilli i Legjislacionit së bashku me Komisionin e Ligjeve, do ia paraqesin seancës plenare”, ka thënë Ruçi.
VOTIMI Ruçi ka refuzuar të japë përgjigje nëse do ta votojë pro apo kundër nismën e demokratëve, duke u justifikuar me rolin mbi palët të kryeparlamentarit. “Do të miratohet apo jo, është shumë shpejt për të dhënë unë verdiktin. Unë jam kryetar i Parlamentit dhe drejtues i kësaj mbledhjeje, kështu që me ndalohet të deklaroj do të miratohet apo nuk do miratohet”, ka thënë ai. Kreu i legjislativit ka thënë se vetingu për politikanët është një nismë që është diskutuar edhe më parë, edhe për t’u realizuar me ligj organik ose me ligjin e dekriminalizimit. “Sigurisht, që vetingu për politikanët është diskutuar edhe në të kaluarën, qoftë me ligjin organik, qoftë me ligjin për dekriminalizimin, miratuar me një konsensus të gjerë nga Kuvendi, sikurse është edhe pjesë e vetingut ligjor të politikanëve, nëpërmjet akteve të Reformës në Drejtësi. Megjithatë, le të presim. Nisma është prezente, është në tavolinën e diskutimit. Do të diskutohet, do të gjykohet dhe do të vendoset në kohën dhe në momentin e duhur”, ka thënë kreu i Kuvendit.