Basha, takim lamtumire me LU: Krenarë për bashkëpunimin me SHBA
Kryetari i Partisë Demokratike, Lulzim Basha, ka pritur dje në zyrën e tij në një takim lamtumire, ambasadorin në largim të SHBA në Tiranë, Donald Lu. Në përfundim të takimit, Basha është shprehur krenar për marrëdhëniet që PD ka me partnerin strategjik të Shteteve të Bashkuara të Amerikës. Gjithashtu, Basha është takuar edhe me zv/ ambasadoren e SHBA në Tiranë, Leyla Moses- Ones. "Takim lamtumire me ambasadorin Donald Lu dhe mirëseardhje me zv. ambasadoren Leyla Moses- Ones. PD, krenare për miqësinë dhe bashkëpunimin me SHBA, partnerin strategjik të Shqipërisë dhe kombit shqiptar", u shpreh Basha pas takimit. Gjatë mandatit të tij si ambasador i SHBA në Tiranë, Donald Lu zhvilloi jo pak përplasje me kreun e PD- së, Lulzim Basha, sidomos gjatë kohës kur në Parlament kalonte Reforma në Drejtësi. Përpara largimit të tij nga Shqipëria, ambasadori i SHBA, Donald Lu, theksoi rëndësinë e bashkimit të gjithë demokratëve dhe frontit opozitar për të pasur sukses. "Unë i kam këshilluar të gjithë miqtë e mi, të cilët punojnë në Partinë Demokratike, dhe së fundmi edhe në LSI, se është shumë e rëndësishme që opozita të shfaqë një front të bashkuar. Dhe që ata njerëz, të cilët e ndiejnë veten mënjanë partisë, sidomos asaj Demokratike, të gjejnë rrugën sërish brenda partisë. Partia Demokratike është një pjesë krenare dhe e fuqishme e kësaj demokracie dhe ajo duhet të ketë sukses që edhe demokracia të ketë sukses. Prandaj, shpresoj që në ditët në vijim, Z. Basha dhe udhëheqësit e tjerë të ndihmojnë në bashkimin e kësaj partie", u shpreh ambasadori i SHBA, Donald Lu.