Arrestohen 12 drejtues mjetesh, 6 për pije, një për ryshfet

Policia Rrugore e Tiranës, në bazë të analizave të bëra për shkaqet e aksidenteve të ndodhura më parë, si dhe evidentimin e njollave të zeza, ka hartuar një tjetër plan operacional “Tispol shtator 2018”, për parandalimin e aksidenteve rrugore. Nisur edhe nga fakti që jo vetëm në rrugët urbane, por edhe në disa rrugë interurbane të kryeqytetit, po kryhen punime, ka një fluks të shtuar trafiku dhe për këtë arsye shumë drejtues mjetesh kryejnë manovra të gabuara në rrugë. Manovra të tilla si parakalime të gabuara, shpejtësi tej normave të lejuara, pozicionime të gabuara në korsitë e lëvizjes, mospërdorim të rripit të sigurimit, kaskës mbrojtëse, përdorim të celularit gjatë drejtimit të automjetit, shkelje të semaforit dhe mosdhënie përparësie këmbësorëve në vijat e bardha etj. Gjatë 24 orëve të fundit, Policia Rrugore e Tiranës ka evidentuar një numër të konsiderueshëm shkeljesh administrative, për të cilat ka përpiluar edhe procesverbalet përkatëse me qëllim adresimin e tyre për shqyrtim dhe gjykim në Organin Administrativ Shtetëror, në Drejtorinë Vendore të Policisë Tiranë. Konkretisht janë konstatuar dhe ndëshkuar 25 drejtues mjetesh për shpejtësi tej normave të lejuara, janë pezulluar 18 leje drejtimi për drejtim mjeti nen efektin e alkoolit. Janë ndëshkuar me gjoba 35 drejtues mjetesh për mospërdorim të rripit të sigurimit, 12 për shkelje të semaforit, 25 për parakalim të gabuar dhe 67 drejtues motomjetesh për mospërdorim të kaskës mbrojtëse. Gjithashtu, në funksion të kontrolleve janë arrestuar në kushtet e flagrancës 12 shtetas, nga të cilët 6 për drejtim mjeti në gjendje të dehur, 4 për drejtim mjeti pa leje drejtimi, një për korrupsion aktiv ndaj funksionarëve që ushtrojnë funksione publike dhe një për falsifikim të dokumenteve zyrtare.