Basha dhe Idrizi firmosin paktin, PDIU rreshtohet në koalicionin opozitar
MEMORANDUMI I BASHKEPUNIMIT, ZGJEDHJET DHE ÇESHTJA ÇAME
Partia Demokratike dhe Partia Drejtësi Integrim dhe Unitet zyrtarizuan bashkëpunimin e tyre 9 muaj para zgjedhjeve vendore të 2019- s.
Pas një ore takim të zhvilluar mes dy kryetarëve dhe drejtuesve të tjerë partiakë, palët njoftuan se PDIU- ja, e cila në themel të programit të saj ka çështjen çame, do të rreshtohet në frontin opozitar. "Opozita është në frontin më të gjerë dhe më e angazhuar dhe e fortë me bashkimin e të gjithë faktorëve kryesorë politikë të vendit pas konkludimit me sukses të bisedimeve me Partinë Drejtësi Integrim dhe Unitet për të shërbyer në interesin e qytetarëve në këtë moment kritik për Shqipërinë dhe shqiptarët. Partia Demokratike dhe Opozita e Bashkuar kanë sot një mision jetik për çdo familje shqiptare. T'i japim fund bashkëqeverisjes me krimin, të largojmë një orë e më parë aleancën e pushtetit me krimin që ka zaptuar Qeverinë, Parlamentin, institucionet e drejtësisë, Policinë, të çlirojmë vendin nga sundimi i bandave. Do garantojmë lëvizjen e lirë për shqiptarët e Çamërisë dhe pronat", tha Basha. Nga ana e tij, kreu i PBDNJ- së, Shpëtim Idrizi, kërkoi zgjidhje të drejtë e të shpejtë për çështjen çame, ndërsa u shpreh se vendi ka nevojë për një opozitë të fortë. "Unë sot dua të shpreh që Partia për Drejtësi Integrim dhe Unitet deri më sot ka qenë në opozitë, sot është pjesë e Opozitës së Bashkuar, sepse përballë një maxhorance arrogante, një ekonomie pa busull që nuk orientohet nga prodhimi, përballë një krimi në realitet në rritje, trafiqeve dhe ajo që është më e rënda, braktisjes së këtij vendi nga shqiptarët, ne kemi nevojë që të kemi një opozitë të fortë", tha Idrizi.
MEMORANDUMI
Dy kryetarët e partive që nënshkruan memorandumin e bashkëpunimit, Lulzim Basha dhe Shpëtim Idrizi, ranë dakord që të punojnë për të rikthyer normalitetin politik e institucional në vend si dhe të krijojnë kushtet për ndarjen e politikës nga krimi si një plagë që po rrënon çdo standard demokracie në vend. Gjithashtu, ky bashkëpunim do të synojë krijimin e kushteve për zgjedhje të lira, të drejta e të ndershme, ku të respektohet barazia e votës e të sig- urohet numërimi i saj. PD dhe PDIU angazhohen në memorandumin e tyre të bashkëpunimit që të përpiqen për zhvillimin e zgjedhjeve të përgjithshme dhe vendore me qëllim rikthimin urgjent të normalitetit në vend dhe ndarjen e sistemit politik nga fenomeni i blerjes së votës, mosnumërimit apo keqnumërimit të saj, nga krimi dhe trafiqet. Zgjidhja e çështjes çame është një tjetër pikë, që i bashkon të dy partitë në këtë koalicion. "PD dhe PDIU bien dakord që në përputhje me Konventën Europiane ' Për të Drejtat e Njeriut', Rezolutën e Kuvendit të Shqipërisë për çështjen çame, të angazhohen për zgjidhjen e çështjes së shqiptarëve të Çamërisë në dimensionet e saj të kujtesës historike, nderimit dhe respektimit të viktimave, garantimit të lëvizjes së lirë të shtetasve shqiptarë të lindur në Çamëri si dhe mbështetjes për zgjidhjen diplomatike dhe juridike të çështjeve pronësore", thuhet në memorandumin e bashkëpunimit.