Meta kthehet nga Vatikani me medaljen për paqen dhe bashkëpunimin
Vizita në Selinë e Shenjtë në vitin e Skënderbeut: Shpresoj që lutjet e Papës të ndihmojnë popullin dhe vendin tim
Presidenti Ilir Meta ka takuar Papa Françeskun në Selinë e Shenjtë në Vatikan në katërvjetorin e vizitës së parë të Papës në Shqipëri, si vendi i parë europian i vizituar prej tij, si dhe në vitin e Heroit tonë Kombëtar, Skënderbeut. Meta ka vlerësuar vëmendjen që ka treguar Papa Françesku për Shqipërinë. Presidenti foli edhe për shkëmbimin e dhuratave me Papën, duke e quajtur kuptimplotë. Sipas Metës, medalja e ullirit që i dhuroi Papa është një simbol i paqes dhe bashkëpunimit, i ofruar si një mesazh se ku duhet të përqendrohet politika: bashkimin e njerëzve dhe popujve, pavarësisht besimeve e përkatësive etnike. Meta tha se vokacioni i Shqipërisë është ai i paqes dhe bashkëjetesës dhe se pas takimit me Atin e Shenjtë kthehet në Shqipëri me një frymë më të madhe për paqe dhe bashkëpunim. Presidenti ka premtuar rikthimin e pronave të kishës katolike dhe komuniteteve të tjera fetare në dobi të rimëkëmbjes shpirtërore të popullit tonë dhe shtoi se shteti do t’i përmbushë më mirë detyrimet e tij, edhe pse bashkëpunimi me kishën katolike deri tani është i shkëlqyer. Presidenti tha se vizita në Selinë e Shenjtë bëhet për të konfirmuar aspiratën europiane të Shqipërisë. Presidenti ka treguar përshtypjet e tij nga vizita, në një intervistë për “Vatican News”.
Z. President, Ilir Meta, çfarë mund të na thoni për audiencën që patët me Papa Françeskun në Vatikan?
Presidenti Meta: Një moment historik për mua personalisht dhe një nder i veçantë të vizitoja Selinë e Shenjtë dhe të pritesha nga Ati i Shenjtë, Papa Françesku, pikërisht tani në prag të 4- vjetorit të vizitës së tij të parë në Europë, ku ai zgjodhi pikërisht vendin tonë, Shqipërinë. Natyrisht, më mbeti në kujtesë nga kjo audiencë pyetja që gazetarët i kishin bërë në avion Papa Françeskut gjatë kthimit nga Shqipëria për në Romë, se përse kishte zgjedhur një vend që nuk ishte anëtar i Bashkimit Europian për të realizuar një vizitë të parë në kontinent dhe përgjigjja e tij ishte: Pikërisht për të dhënë një sinjal.
Vizita ime në Vatikan në këtë vit historik për ne shqiptarët, siç është Viti i Heroit tonë Kombëtar, Gjergj Kastriot Skënderbeut, pa dyshim që mbart edhe mesazhin e raportit shumë të fortë, midis Shqipërisë dhe Selisë së Shenjtë. Por në mënyrë të veçantë, të vendosmërisë tonë për të forcuar dhe mbrojtur identitetin tonë europian, ashtu sikurse edhe për të hedhur një hap më tej drejt çeljes së negociatave për anëtarësim në Bashkimin Europian, shpresojmë gjatë vitit të ardhshëm.
Si e shikoni ju kujdesin atëror dhe dashurinë e Papa Françeskut ndaj popullit shqiptar?
Presidenti Meta: Ati i Shenjtë, Papa Françesku ka treguar që në fillimet e para të tij në këtë detyrë kaq të lartë, një vëmendje të jashtëzakonshme për Shqipërinë dhe për shqiptarët, jo vetëm me vizitën e tij historike 4 vite më parë në vendin tonë, por njëkohësisht me Shenjtërimin e Nënë Terezës, me lumturimin e 38 martirëve të Kishës sonë Katolike, me emërimin Kardinal Nderi në Vatikan të At Ernest Simon Troshani dhe me shumë akte të tjera konkrete.
Ashtu sikurse dua të theksoj në mënyrë të veçantë, se pikërisht në Ditën e Shën Nënë Terezës ai lartësoi Kishën Katolike të Kosovës, duke e shndërruar në Dioqezë.
Të pafundme janë aktet e tij të vëmendjes ndaj Shqipërisë, popullit shqiptar, ndaj klerit katolik në vendin tonë, që ka vuajtur e sakrifikuar aq shumë në të kaluarën, por edhe ndaj harmonisë ndërfetare në Shqipëri, që Papa Françesku e vlerëson shumë dhe na kujton se duhet ta ruajmë dhe ta zhvillojmë çdo ditë.
Njëkohësisht, dua të theksoj angazhimin e tij për t’i kushtuar një vëmendje maksimale edukimit të të rinjve, për të luftuar varësitë e tyre nga fenomene negative, si droga, alkooli etj., dhe për t’iu siguruar një të ardhme më të mirë në vendet tona.
Sikurse Papa Françesku e tha gjatë këtij takimi, për fat të keq Europa po përjeton një “dimër demografik” dhe kjo nuk duhet të ndodhë me Shqipërinë apo me vende të tjera, që kanë mundësinë për t’u rritur dhe zhvilluar e njëkohësisht për t’u dhënë më shumë të ardhme të rinjve në vendet tona e jo përmes emigrimit.
Z. President, të ndalemi pak te shkëmbimi i dhuratave. Ati i Shenjtë ju dhuroi një medalje me simbolin e ullirit dhe ju i bëtë një dhuratë të veçantë…
Presidenti Meta: Mendoj se ishte një shkëmbim mjaft kuptimplotë i dhuratave. Unë i dhurova një ikonë të Shën Marisë, “Puthja e ëmbël”, të punuar me shumë dashuri në Shqipëri. Ndërsa Papa Françesku kishte zgjedhur “ullirin”, simbol të paqes dhe bashkëpunimit, si një mesazh se ku duhet të përqendrohet politika: bashkimin e njerëzve dhe popujve, pavarësisht besimeve e përkatësive etnike.
Çfarë mesazhi do çoni në Shqipëri nga audienca që patët me Papa Françeskun?
Presidenti Meta: Nga ky takim kthehem me mesazhin e një angazhimi edhe më të madh për paqe, për bashkëpunim, për t’iu dhënë një mundësi më të madhe të rinjve tanë që të shohin të ardhmen e perspektivën në Shqipëri, përmes një edukimi më të mirë, një vëmendje më të madhe ndaj tyre dhe natyrisht me besimin se, falë kësaj mbështetje të Selisë së Shenjtë dhe lutjeve të vetë Papa Françeskut, Shqipëria do të vijojë në rrugën e saj të europianizimit, të modernizimit e njëkohësisht edhe të bashkëjetesës, gjithmonë në paqe me të gjithë popujt e kombet e rajonit tonë.
Ju patët edhe një takim me Sekretarin e Shtetit të Vatikanit, Kardinalin Pietro Parolin, me të cilin folët mbi marrëdhëniet ndërmjet Selisë së Shenjtë dhe Republikës së Shqipërisë, marrëdhënie të cilat ju i quajtët të forta e të mira…
Presidenti Meta: Kemi pasur një bisedë të shkëlqyer me eminencën e tij, Kardinalin Parolini për marrëdhëniet bilaterale. Kemi shprehur angazhimin për të adresuar më me efikasitet disa çështje ende të mbartura nga e kaluara sa i takon disa të drejtave të Kishës Katolike në Shqipëri dhe unë kam shprehur angazhimin tim, por edhe të institucioneve tona, për t’u përmbushur të gjitha detyrimet, si ndaj Kishës Katolike ashtu edhe ndaj komuniteteve të tjera fetare, në drejtim të rikthimit të pronave dhe në drejtim të krijimit të lehtësirave të duhura për aktivitetin e tyre, në dobi të rimëkëmbjes shpirtërore të popullit tonë.
Po kështu kam shprehur në mënyrë të veçantë vlerësimet më të mira, për angazhimet sociale të Kishës Katolike në Shqipëri, për shumë vepra që janë bërë në dobi të komuniteteve, për përpjekjet e vazhdueshme për të dhënë mesazhet e forcimit të familjes, për të edukuar të rinjtë me vlerat më të mira shoqërore e njerëzore, për t’i mbajtur ata larg fenomeneve si droga, alkooli, që ua humbin qëllimet e mira në jetë dhe frymëzimet për t’iu përkushtuar realizimit të tyre.
Lidhur me bashkëpunimin ndërmjet shtetit edhe bashkësisë katolike të Shqipërisë, çfarë mund të thuhet?
Presidenti Meta: Besoj se do të mund të kemi një bashkëpunim edhe më të dobishëm. Padyshim që bashkëpunimi deri më tani ka qenë i shkëlqyer, por ka ende mjaft mundësi për ta bërë më efikas dhe për të lehtësuar më tej aktivitetin e Kishës Katolike, por edhe të besimeve të tjera në Shqipëri. Shteti do t’i përmbushë më mirë besoj detyrimet e tij. Shqipëria dhe Bashkimi Europian? Presidenti Meta: Shqipëria, anëtare e Bashkimit Europian. Ky është i vetmi projekt që nuk ndihmon vetëm Shqipërinë, por edhe Ballkanin, madje edhe vetë Europën. Cili është vokacioni i Shqipërisë në Ballkan? Presidenti Meta: Patjetër është vokacioni i paqes dhe i bashkëjetesës. Është vokacion tërësisht europian.
Z. President, si ktheheni në Shqipëri pas audiencës, që patët me Papa Françeskun dhe takimin me Sekretarin e Shtetit të Vatikanit?
Presidenti Meta: Kthehem shumë i lumtur për vëmendjen që Selia e Shenjtë, që Papa Françesku, në mënyrë të veçantë, vazhdojnë t’i kushtojnë popullit tonë, vendit tonë, kombit tonë, kishës sonë, njerëzve tanë dhe jam i sigurt që ky raport do të njohë gjithmonë zhvillime shumë të forta të bashkëpunimit institucional dhe shpirtëror dhe shpresoj që edhe lutjet e Papa Françeskut ta ndihmojnë popullin tim dhe vendin tim.