Sejko: Ekonomia, orientim nga industria e turizmi
"Zgjerimi i produktivitetit kërkon rikualifikim të punonjësve"
Guvernatori i Bankës së Shqipërisë, Gent Sejko, deklaroi dje se produktiviteti i rritjes ekonomike duhet të orientohet drejt sektorëve, si industria dhe turizmi. Deklarata e Guvernatorit Sejko u bë gjatë prezantimit nga Drejtori Ekzekutiv i Bankës Botërore për Shqipërinë, Patrizio Pagano, me temë "Ngadalësimi i produktivitetit dhe hipoteza e stanjacionit shekullor". "Së pari, ekonomia shqiptare ka qenë dhe është në një proces ristrukturimi të modelit të saj të rritjes. Ndër të tjera, ky proces parashikon një mbështetje më të madhe të rritjes në sektorët e orientuar drejt eksportit, si industria dhe turizmi, si dhe një orientim më të madh të resurseve financiare drejt zgjerimit të investimeve. Zhvendosja e burimeve financiare, njerëzore dhe menaxheriale, midis sektorëve të ekonomisë, kërkon kohë dhe shoqërohet me ngadalësim të përkohshëm të produktivitetit. Megjithatë, ribalancimi i burimeve të rritjes, nga ndërtimi e tregtia drejt industrisë dhe shërbimeve të eksportit, është një proces i cili tashmë ka nisur. Kjo zhvendosje graduale vihet re dhe në ribalancimin sim- etrik të portofolit të kredisë bankare", u shpreh Sejko. Guvernatori Sejko tha se në vëmendje të zgjerimit të produktivitetit duhet të jetë edhe kualifikimi i fuqisë punëtore nëpërmjet arsimit profesional. "Së dyti, niveli dhe shpejtësia e zgjerimit të produktivitetit ka një lidhje të drejtë me shkallën e edukimit dhe të kualifikimit të fuqisë punëtore. Reforma e sistemit të lartë arsimor dhe rritja e theksit në arsimin profesional, janë dimensione esenciale të ristrukturimit të ekonomisë, frytet e të cilave do të bëhen gjithnjë e më të dukshme në afatin e gjatë. Megjithatë, Shqipëria ka ende punë për të bërë në këtë drejtim, në veçanti drejt frenimit të emigrimit të fuqisë së kualifikuar punëtore dhe të rifreskimit të aftësive të fuqisë së saj punëtore nga sektori privat. Së treti, produktiviteti është i lidhur ngushtë me përmirësimin e aftësive menaxheriale të biznesit. Fushata për rritjen e formalizimit, rritja graduale e konkurrencës, si dhe rishikimi i ligjit për falimentin, do të krijojnë stimujt e duhur në këtë drejtim. Në veçanti, jam i bindur se përmirësimet ligjore e nënligjore të bëra në drejtim të respektimit të kontratës së kredisë bankare, do të ndihmojnë jo thjesht e vetëm shëndetin e bankave, por do të stimulojnë dhe rritjen e disiplinës dhe efektivitetit në përdorimin e fondeve nga bizneset shqiptare", u shpreh Guvernatori.