Veliaj: Piramida, shkollë alternative për teknologjinë
Ndërtesa kult e periudhës së diktaturës, Piramida, do të transformohet shumë shpejt në një nga qendrat më të mëdha të inovacionit, teknologjisë, artit e kulturës në rajon. Ky është vizioni i Bashkisë së Tiranës për objektin në fjalë, prezantuar nga kryetari Erion Veliaj në Festivalin e Inovacionit, i pari i këtij lloji në vend. Kjo ndërtesë, tashmë bosh, pritet t’u shërbejë 5 mijë nxënësve, që nga moshat e vogla deri te ato madhore. “Bashkë me Kryeministrin dhe qeverinë shqiptare, kemi vendosur që ndërtesën më ikonike të Tiranës, ta kthejmë në një shkollë alternative për 5 mijë të rinj çdo muaj, të cilët të mësojnë teknologji informacioni. Për sa kohë jemi të qartë që e ardhmja nuk është nesër, por tani, kjo që po ndodh, dhe nëse bashkojmë ata që krijojnë me ata që investojnë, mund të kemi një histori suksesi në Ballkan”. Në organizimin rajonal ku u prezantuan idetë më të mira inovative, kreu i bashkisë numëroi platformat e iniciuara nga bashkia që kanë njohur sukses, si “Tirana ime” apo “Smart Bike share”, tregues i faktit që shqiptarët e përqafojnë inovacionin. Kreu i Dhomës së Tregtisë dhe Industrisë në Tiranë, Nikolin Jaka, falënderoi Veliajn për mbështetjen e biznesit dhe të nismave të tilla. Ai theksoi se kjo energji dhe ky model suksesi duhet të transmetohet edhe te njësitë e tjera vendore. Organizatori tjetër i Festivalit të Inovacionit, kreu i Dhomës së Tregtisë, Nikolin Jaka, falënderoi Veliajn për mbështetjen e biznesit dhe të nismave të tilla. Ai theksoi se kjo energji dhe ky model suksesi duhet të transmetohet edhe te njësitë e tjera vendore. Mbi 300 kompani nga i gjithë rajoni prezantuan praktikat më të mira, idetë dhe projektet inovative të tyre në Tiranë në fushën e start up- eve, turizëm, teknologji, sistemin bankar, energjetikë dhe telekomunikacion.