Basha: Bashkëpunëtori në vrasjen e Azemit kërcënoi Agron Shehajn
Kryetari i opozitës, Lulzim Basha, ka paralajmëruar Kryeministrin Rama se, nëse deputetëve të opozitës do t’u preket edhe një fije floku, ai do të mbajë përgjegjësi me kokën e tij. Deklarata e fortë e Bashës erdhi në një dalje të jashtëzakonshme për mediat, menjëherë pas kërcënimit që kryeinspektori i IKMT- së i bëri deputetit të PD- së, Agron Shehaj. Basha zbuloi se kryeinspektori Fatmir Meta është bashkëpunëtor në vrasjen e liderit të dhjetorit, Azem Hajdari. “Kryeinspektori Fatmir Meta, Fatmiri i Nasibesë siç njihet ndryshe, kërcënoi deputetin e Partisë Demokratike, Agron Shehaj, ndërsa ai bënte detyrën në krah të njerëzve, duke i kërkuar llogari kryeinspektorit dhe banditëve të tij për veprimet e tij antiligjore. Për ata që nuk e njohin, sepse janë tepër të rinj ose dhe e kanë harruar historinë e 20 vjetëve më parë, Fatmiri Nasibesë, Fatmir Meta, është ish- shefi i Komisariatit të Tropojës në periudhën më të errët. Me makinën e shefit të Komisariatit të Tropojës, pra, të Fatmir Metës, udhëtoi më 12 shtator 1998 për në Tiranë, banda që ekzekutoi heroin e demokracisë, Azem Hajdari. Po atë natë, me makinën e shefit të tyre, Fatmir Meta, banda e veshur me uniformën e Policisë u kthye në Tropojë e pa u ndaluar nga askush. Nën përgjegjësinë e plotë të Fatmir Metës, Komisariati i Tropojës veshi nën uniformë bandat dhe banditët, që terrorizuan të gjithë veriun e Shqipërisë. Bashkëpunëtori në vrasjen e Azem Hajdarit, anëtari i bandës së Zani Çaushit dhe kryeinspektor i Edi Ramës kërcënoi sot deputetin Agron Shehaj”, tha Basha. Sipas kreut të PD- së, kur një përfaqësues i Policisë arrin të kërcënojë një deputet, është e qartë se nuk ka më siguri për askënd në këtë vend. “Që prej ardhjes së Edi Ramës në pushtet, bashkëpunëtori në vrasjen e Azem Hajdarit, i shërben bandës së Edi Ramës dhe Fatmir Xhafës. Rama dhe Xhafaj e kanë hedhur Policinë në sulm kundër popullit për të mbrojtur grabitjen, për të mbrojtur oligarkët, për të mbrojtur kriminelët, me të cilët ndajnë paratë. Kur policia arrin të dhunojë një deputet, është e qartë se ajo është kthyer në një bandë pa tru në shërbim të kryesundimtarit. Nuk ka më siguri për askënd, me përjashtim të kriminelëve. Sot në Shqipëri janë të sigurt vetëm kriminelët, të cilët bëjnë ligjin me bekimin dhe ndihmën e Edi Ramës. Edi Ramës po i jap këtë paralajmërim: Një fije floku po iu prek çdo deputeti apo përfaqësuesi të opozitës, nga banditi yt Fatmir Meta apo banditët e tjerë, që ke lëshuar si zagarë në të gjithë Shqipërinë, përgjegjësinë do ta mbash ti dhe vetëm ti Edi Rama, në kokën tënde”, tha Basha. Partia Demokratike depozitoi një kallëzim penal për Fatmir Metën, ndërkohë që Basha e paralajmëroi se ndonëse drejtësia e ka shpëtuar njëherë për çështjen “Hajdari”, shumë shpejt rrota e drejtësisë do ta kapë për bishti.