Pakti paqësor për Idlibin, Turqia: Civilët do qëndrojnë
Zona e çmilitarizuar do jetë 20 km, armët e rënda hiqen më 10 tetor
Turqia zyrtare ka deklaruar se kufijtë e provincës së kontrolluar nga rebelët do të mbrohen sipas marrëveshjes së nënshkruar me Rusinë.
Ministri i Jashtëm turk thotë se asnjë civil nuk do të largohet nga provinca veriperëndimore e Idlibit në Siri, sipas një marrëveshjeje të nënshkruar nga Ankaraja dhe Moska për të krijuar një zonë të çmilitarizuar në fortesën e fundit të rebelëve sirianë. “Kufijtë e Idlibit do të mbrohen sipas memorandumit të mirëkuptimit të nënshkruar në Soçi. Nuk do të ketë ndryshim në statusin e Idlibit”, tha ministri Mevlut Cavusoglu të martën, duke shtuar se vetëm grupet terroriste do të dëbohen nga zona. Marrëveshja për të ndalur planet për një ofensivë në Idlibin e kontrolluar nga rebelët u njoftua të hënën në vendpushimin e Soçit në Detin e Zi pas një takimi mes Presidentit rus Vladimir Putin dhe homologut të tij turk, Recep Tayyip Erdogan. Irani e përshëndeti marrëveshjen si sukses të diplomacisë. Në Siri, Irani po lufton si një alet i Presidentit Bashar al- Assad së bashku me forcat ruse, ndërsa Turqia ka mbështetur disa grupe rebele gjatë luftës civile shtatëvjeçare. Presidenti i Rusisë, Vladimir Putin, tha se zona e çmilitarizuar do të jetë 15- 20 km e gjerë dhe do të përcaktohet më 15 tetor. Bazuar në marrëveshjen e nënshkruar me Erdogan, Presidenti Putin tha se armët e rënda do të tërhiqen nga të gjitha forcat e opozitës deri më 10 tetor, një masë e mbështetur nga qeveria siriane. Duke e përshkruar marrëveshjen si një rezultat serioz, Putin tha se “Rusia dhe Turqia kanë konfirmuar vendosmërinë e tyre për të luftuar terrorizmin në Siri në të gjitha format e tij”. Ndërsa Presidenti Erdogan tha se vendi i tij dhe Rusia do të kryejnë patrullime të koordinuara në zonën e çmilitarizuar. “Ne vendosëm për krijimin e një hapësire të pastër nga armët midis zonave që janë nën kontrollin e opozitës dhe regjimit”, tha Erdogan. Qeveria siriane kishte njoftuar planet për të nisur një ofensivë të madhe ushtarake në provincën Idlib, të kontrolluar prej grupeve të ndryshme të armatosura të opozitës. OKB paralajmëroi se kjo do të ishte katastrofë humanitare. Që nga fillimi i shtatorit, dhjetëra njerëz janë vrarë dhe plagosur në sulmet ajrore të qeverisë siriane dhe avionëve luftarakë të aleatëve të saj rusë mbi Idlib. Gjatë javës së kaluar, Turqia ka vendosur përforcime dhe ka zgjeruar strukturat mbrojtëse në shumë pika vëzhgimi në të gjitha territoret e kontrolluara nga opozita në Idlib, Aleppo dhe në provincën veriore Hama. Lokacionet u caktuan pas një marrëveshjeje midis Turqisë, Rusisë dhe Iranit në korrik 2017.