Basha: Kush ngre kartonin për Teatrin, do trajtohet si terrorist shtetëror
“Kush ngre kartonin për të kaluar një ligj të tillë, do trajtohet politikisht nga opozita si terrorist shtetëror”
Kryetari i opozitës, Lulzim Basha, e cilësoi votimin e ligjit që do t’i hapë rrugë prishjes së Teatrit, një grusht shteti në kushtet kur vendi nuk ka Gjykatë Kushtetuese.
Në një takim që zhvilloi në selinë e Partisë Demokratike me një grup artistësh dhe intelektualësh, Basha paralajmëroi çdo deputet të maxhorancës që do të votojë ligjin për Teatrin se do të trajtohet politikisht nga opozita si terrorist shtetëror. “Çdo deputeti të rilindjes që do të jetë në atë sallë, dua t’i them se votimi i një ligji që do t’i hapë rrugë shkatërrimit të Teatrit është i papranueshëm për Partinë Demokratike; është akt grushti shteti dhe vendos çdo deputet të rilindjes në pozita të barabarta me terroristët, terroristët, të cilët, në mungesë të Gjykatës Kushtetuese, tjetërsojnë pronën publike, shkatërrojnë memorien historike, gllabërojnë dhe shkatërrojnë vlerat kulturore për të mbushur xhepat e Edi Ramës dhe kriminelëve që bashkëqeverisin vendin me të. Opozita do të mbajë një qëndrim të qartë dhe të prerë, në varësi të ngjarjeve. Secili prej kartonëmbajtësve të rilindjes në Kuvendin e Shqipërisë ka orët e fundit të reflektojë, çdokush që ngre kartonin për të kaluar një ligj të tillë antikushtetues dhe për të shembur në mes të terrorit shtetëror godinën e Teatrit Kombëtar, do të trajtohet politikisht nga opozita si terrorist shtetëror”, tha Basha. Kreu i opozitës e ka cilësuar antikushtetuese vendimmarrjen që maxhoranca pritet të marrë sot në Parlament, duke kujtuar se po i hapet rrugë një procesi fasadë për të pastruar paratë e krimit. “Në Kuvendin e Shqipërisë do të kryhet një akt antikushtetues. Në vend të rrëzimit apo pranimit të dekretit të Presidentit të Republikës për ligjin korruptiv Rama- Fusha, do të amendohet ky ligj për t’i hapur rrugën një procesi fasadë 30- ditor, në fund të së cilës krimi i organizuar dhe përfaqësuesit e tyre përsëri do të marrin lejen për të gllabëruar pronën publike, për të shkatërruar një perlë të kulturës, historisë, trashëgimisë kulturore dhe memories qytetare dhe kombëtare, siç është rrethi kulturor ‘ Skënderbeg’, Teatri Kombëtar dhe për të pastruar paratë e krimit dhe të drogës me një përfitim marramendës prej 200 milionë eurosh për Edi Ramën dhe bashkëpunëtorët e tij në këtë krim. Partia Demokratike ka një qëndrim të qartë dhe të pandryshuar. Ligji Rama- Fusha është një ligj antikushtetues”, u shpreh Basha.
VENDIMI
Partia Socialiste miratoi të mërkurën vetëm me votat e saj ndryshimin e dekretit të Presidentit për ligjin që i hap rrugën prishjes së Teatrit Kombëtar. Shumica nuk hartoi një projektligj të ri, por ndryshoi ligjin e miratuar një herë nga Parlamenti, nismë e cila u rikthye me dekret nga Presidenti. Ndërkohë që në ndryshimet e lexuara nga deputeti i PS- së, Ilir Beqaj, maxhoranca ka plotësuar kërkesat e Brukselit, duke hapur garën për kompanitë e tjera që do të duan të ndërtojnë godinën e Teatrit të ri Kombëtar. Në draftin e kthyer nga Presidenti, kompania e vetme në garë ishte ‘ Fusha shpk’, ndërkohë që në ndryshimet e miratuara në Komisionin e Veprimtarive Prodhuese është futur koncepti i kompanive private. Po ashtu, edhe thirrja e hapur për të marrë pjesë në garë. “Thirrje e hapur” është ftesa e hartuar nga Komisioni për palët private që janë të interesuara për të paraqitur një propozim për realizimin e projektit te zhvillimit te zonës se Teatrit Kombëtar, duke përfshirë projektimin, ndërtimin dhe dorëzimin e godinës se re te Teatrit Kombëtar, sipas kushteve dhe kritereve të përcaktuara në këtë ligj”, thekson amendamenti.