Rama nxjerr dokumentin: Basha kryetar bashkie privatizoi Estradën
Reagimi i Bashës: Kryehajduti kërkon skutave për shkresa të pavlera. Ku janë kinematë që Rama i zëvendësoi me pallate?
Kryeministri Edi Rama e cilëson hipokrite gjithë përpjekjen e opozitës për të ndalur ndërtimin e Teatrit të ri Kombëtar.
Për të treguar se shqetësim i opozitës nuk ka qenë asnjëherë teatri, Rama në Parlament publikoi një dokument ku kreu i PD- së, Lulzim Basha, në cilësinë e kryebashkiakut të Tiranës shkëmbente korrespondencë me ish- ministrin e Ekonomisë, Florion Mima, për të privatizuar godinën e estradës së kryeqytetit. “Ajo që më nxori këtu është një shkresë, të cilën Florian Mima, ministër i Ekonomisë, ia dërgon Lulzim Bashës, kryetar i bashkisë. Dhe çfarë i kërkon? I kërkon privatizimin e Teatrit të Metropolit, ( Teatri i Estradës – shënon Floriani) – për llogari të deputetit Astrit Veliaj. I vetmi aset kombëtar në dispozicion të Bashkisë së Tiranës, i transformuar nga një kafene e degraduar në një Teatër të Metropolit, përpara se Lulzim Basha të shkonte në bashki, çohet për privatizim, jo për Partneritet Publik Privat, as për të ndërtuar një Teatër të ri të Metropolit në këmbim të një kontributi të zotit Veliaj dhe në funksion të një përfitimi legjitim edhe të zotit Veliaj, pasi të investon- te për Teatrin e ri, por privatizim për të ndërtuar pallat. Pallat me dyqane dhe me dhoma gjumi”, theksoi Kryeministri.
REAGIMI Në një reagim lidhur me akuzën e Kryeministrit, Basha ka kujtuar se Teatri i Metropolit është ende aty, ndërkohë që shumë objekte të kinemave që kanë qenë në kryeqytet sot janë pallate. “Kryehajduti kërkon skutave për shkresa të pavlera. Teatri i Metropolit është aty! Kinema 17 Nëntorin, Kinema Republikën, Kinema Partizanin, Kinema Ali Demin i ka shkatërruar Rama dhe ka ndërtuar pallate”, sqaroi Basha. Por për kreun e qeverisë, hipokrizia e demokratëve është e qartë kur flasin për çështjen e Teatrit Kombëtar, ndërkohë që kur kanë pasur pushtet kanë kërkuar privatizimin e këtyre objekteve. “Natyrisht që estrada është domain ekskluziv i PD- së dhe është absolutisht e drejta legjitime e Lulzim Bashës, e Florian Mimës dhe e të gjithëve me radhë në atë oborr, që për estradën të kenë fjalën e fundit. Por në rastin konkret, jemi përpara një shembulli nga qindra e mijëra shembuj që mund të nxjerrim, për të ballafaquar fytyrën e tyre kur flasin, me fytyrën në pasqyrën e fakteve të punës së tyre, që tregon se sa hipokrite është e gjithë përpjekja e tyre. Është hipokrite kur bërtasin për të mbrojtur Teatrin Kombëtar, një godinë e marrë fund, që vetëm Teatër nuk mund të jetë dhe as monument kulture nuk mund të konsiderohet. Ndërkohë që, po ju jap një shembull, e ka skenën 8 metra të gjerë. E dini se sa është gjerësia e skenës së Teatrit të ri të Turbinës? 24 metra. 8 metra e ka Teatri Kombëtar. Edhe sikur të merrnim hipotezën që do të mund të restaurohej, gjë që është e pamundur dhe e panevojshme, përsëri do të kishim një skenë prej 8 metrash, – vatër kulture, – në rastin më të mirë”, sqaron kreu i qeverisë.