Kryeprokurorja: Vlora ka kriminalitetin më të lartë
"Ka një rritje me 10 për qind të njoftimeve të veprave penale"
Kryeprokurorja e Përgjithshme e përkohshme, Arta Marku, nga Kuvendi i Shqipërisë deklaroi se nga të dhënat e kriminalitetit qyteti i Vlorës rezulton me kriminalitetin më të lartë. Gjatë raportit të Prokurorisë së Përgjithshme për vitin 2017, Marku sqaroi se qyteti me kriminalitetin më të ulët rezulton Dibra dhe theksoi se ka pasur një njoftim në lidhje me njoftimin e veprave penale. "Në lidhje me të dhënat e kriminalitetit rezulton që kriminalitetin më të lartë e ka Qarku Vlorë dhe atë më të ulët Qarku Dibër. Sa u takon raporteve mes krimeve dhe kundërvajtjeve penale bazuar në statistikat që disponohen rezulton që 87 % u përkasin krimeve, ndërkohë që pjesa tjetër u përkasin kundërvajtjeve. Ka pasur një përmirësim të ndjeshëm lidhur me njoftimin e veprave penale krahasuar me një vit më parë. Ka një rritje me 10% të njoftimeve të veprave penale. Numri më i lartë i procedimeve penale është regjistruar në Tiranë, Durrës, Elbasan, Shkodër, Fier e Korçë. Numri më i vogël i procedimeve është regjistruar në Përmet, Pukë e Mat", deklaroi Marku në Parlament. Kryeprokurorja ka sqaruar edhe punën e bërë për luftën ndaj korrupsionit. "Numri i procedimeve penale për korrupsion aktiv të funksionarëve publikë është 124 apo 163.8% më shumë krahasuar me vitin 2016. Korrupsioni në sistemin e drejtësisë ka ulje, vetëm 1 procedim penal me katër të pandehur. Ndërsa një vit më parë, 3 procedime penale", sqaroi Kryeprokurorja. Sipas të dhënave të raportit vjetor të Prokurorisë së Përgjithshme, rezulton se në vitin 2017 janë filluar kryesisht 148 procedime penale nga ana e Prokurorisë. "Kallëzime nga nëpunësit publikë: në vitin 2017 rezulton të kenë ardhur në prokurori 1822 kallëzime, që do të thotë rritje prej 17,3 % në krahasim me vitin 2016; në vitin 2016 rezulton të kenë ardhur në prokurori 1553 kallëzime, që do të thotë rritje prej 31,5 % në krahasim me vitin 2015; në vitin 2015 rezulton të kenë ardhur në prokurori 1181 kallëzime, që do të thotë ulje prej 7,4 % në krahasim me vitin 2014; në vitin 2014 rezulton të kenë ardhur në prokurori 1275 kallëzime, që do të thotë rritje prej 17,3 % në krahasim me vitin 2013, ndërsa në vitin 2013 rezulton të jenë 1087 kallëzime", thuhet në raportin e Prokurorisë së Përgjithshme.