Spitali kërkon lirimin e mjekëve: Rishikoni masat, po rrezikohen pacientët
Komisioni mjekësor: Masë ekstreme dhe e paprecedent. Kanë mbetur pa mbuluar shërbimi i hemodinamikës dhe kardiologjisë
Furtuna me arrestimet në Spitalin e Shkodrës ka sjellë reagimin e mjekëve, të cilët e konsiderojnë këtë si një masë ekstreme dhe të paprecedent.
Ata bëjnë thirrje që të rishikohen këto masa, pasi dhjetëra pacientëve iu rrezikohet jeta për shkak se i kanë të domosdoshme ndërhyrjet kirurgjikale. Komisioni mjekësor në Spitalin Rajonal të Shkodrës reagoi përmes një deklarate për shtyp. Duke folur edhe në emër të kolegëve, mjeku Gëzim Galiqi u shpreh se komisioni mjekësor konteston masën ekstreme të arrestimit të personelit të spitalit të Shkodrës. "I kërkojmë Prokurorisë të rishikojë masat e marra, për faktin se bluzat e bardha që janë ndaluar përfaqësojnë figura të rëndësishme në sistemin shëndetësor të Shkodrës, duke mbuluar shërbime shëndetësore si hemodinamika dhe ndërhyrjet invazive për sëmundje të rënda të zemrës, që rrezikojnë jetët e pacientëve, si infarkti. Të gjithë këta pacientë, pas arrestimeve, janë të pambuluar në shërbimin e hemodi- namikës dhe kardiologjisë. Në kushtet edhe të mungesës së mjekëve specialistë, mungesa e këtyre specialistëve të ndaluar është e pazëvendësueshme", thuhej në deklaratën e komisionit mjekësor. Më tej, në deklaratë thuhet se në sistemin shëndetësor, krejtësisht të vertikalizuar, asnjë vendim financiar nuk merret pa u konsultuar me institucionin e linjës, ndaj edhe vihet në dyshim protagonizmi i bluzave të bardha. "Aksioni i komisionit do të vijojë të përshkallëzohet në ruajtje të figurës së mjekut, tashmë të nëpërkëmbur. Kolegët tanë janë të fundit që kanë përgjegjësi sepse blerjet dhe tenderat bëhen nga vetë ministria dhe mjekët, si pjesë e komisioneve të ndryshme, firmosin në të mirë të institucionit", u shpreh më tej mjeku Gal- iqi. Reagimi i Spitalit të Shkodrës vjen një ditë pasi 9 punonjës të saj, mes të cilëve dy ish- drejtues, kanë përfunduar me masën e sigurisë "arrest me burg" dhe "arrest shtëpie". Për pesë prej tyre është vendosur "arrest me burg", nga të cilët 3 janë të arrestuar dhe 2 të shpallur në kërkim, ndërsa katër të tjerë janë me masën e sigurisë "arrest shtëpie". Kontrolli i Lartë i Sh- tetit bëri një auditim në spitalin e Shkodrës dhe gjeti shkelje, sipas tyre, te reparti i hemodinamikës apo kardiologjinë, duke bërë që më pas Prokuroria të nisë hetimet. Pas dy muajsh nga këto hetime, njofton Prokuroria e Shkodrës, është arrestuar ish- drejtori Përparim Çela, ndërsa është shpallur në kërkim ish- drejtoresha dhe mjekja Dhurata Uruçi. Po ashtu, është arrestuar shefi i ko- reonarografisë, Luan Dragusha, infermieri i hemodinamikës Renato Kepi, dhe është shpallur në kërkim mjeku Edmir Smajli. Mësohet se Gjykata ka lënë në "arrest shtëpie" farmacisten Karmen Kaçulini dhe nga administrata Amanda Matlija, Juliana Zhuri dhe Albana Mehmetaj. Momentalisht, të arrestuarit, të shpallurit në kërkim dhe ata në "arrest shtëpie" janë pezulluar nga detyra.