S’regjistroi 7 shtetas turq, pranga polices së Rinasit
Efektivja me detyrë kontrollore, Brunilda D., dyshohet se nuk ka kryer regjistrimin në sistem të 7 shtetasve turq në Aeroportin e Rinasit, të cilët disa ditë më parë u kapën duke tentuar të kalonin kufirin shqiptar në drejtim të Malit të Zi. Sipas njoftimit të Ministrisë së Brendshme, dyshimet për implikimin e kësaj efektiveje lindën pikërisht në momentin kur shtetasit e huaj u ndaluan në Pikën e Kalimit Kufitar me Malin e Zi. Më pas, nga verifikimet e kryera në aeroportin "Nënë Tereza", rezultoi se këta shtetas ishin lejuar të hynin në territorin shqiptar në mënyrë antiligjore nga kontrollorja Brunilda D., e cila nuk kishte kryer regjistrimin e tyre në sistem. Në këto rrethana, ajo është arrestuar dje nga SHÇBA për veprat penale të "Shpërdorimit të detyrës" dhe "Dhënie ndihme në kalim të paligjshëm kufiri". Megjithatë, deri tani nuk është saktësuar nëse një veprim i tillë i efektives është kryer nga neglizhenca apo në këmbim të ndonjë ryshfeti. Ministria e Brendshme njoftoi dje se SHÇBA arrestoi në flagrancë një punonjëse të Policisë Kufitare në Rinas nën dyshimet për shpërdorim detyre dhe dhënie ndihme për kalim të paligjshëm të kufirit. "Dyshimet për implikimin e punonjëses së Policisë, Brunilda D., me detyrë kontrollore në Komisariatin e Policisë Kufitare dhe Emigracionit Rinas, lindën pas kapjes së 7 shtetasve turq, që tentuan të kalojnë kufirin shqiptar drejt Malit të Zi, të cilët deklaruan se kishin hyrë nëpërmjet Rinasit në Shqipëri. Nga hetimet e kryera rezultoi se këta shtetas janë lejuar të hyjnë në territor në mënyrë antiligjore nga punonjësja e Policisë, , duke mos kryer regjistrimin në sistem", thuhet zyrtarisht nga Ministria e Brendshme. Më tej, theksohet se tashmë mbi të rëndojnë akuzat për veprat penale "Shpërdorim detyre" dhe "Dhënie ndihme për kalim të paligjshëm të kufirit".