PD: Marku largoi prokurorët që sekuestruan pronat e Habilajve
“Prokuroria e Tiranës të pezullojë Markun e të nisë hetimin”
Partia Demokratike ka kërkuar dje nga Prokuroria e Tiranës që të urdhërojë pezullimin nga detyra të Kryeprokurores së Përgjithshme të Përkohshme, Arta Marku dhe të nisë hetim ndaj saj.
Nënkryetari i Komisionit të Ligjeve, Enkelejd Alibeaj, tha dje se emri i Arta Markut u bë me qëllim për të shkatërruar hetimet për dosjen e Saimir Tahirit dhe të Emiljano Shullazit. “Në mënyrë të qëllimshme dhe aktive, Arta Marku gjatë 9 muajve në krye të Prokurorisë i ka shërbyer vetëm një qëllimi: Shkatërrimin e ekipit, që po heton Saimir Tahirin dhe shpërbërjen e ekipit që nxori para drejtësisë Emiljano Shullazin. Me këtë detyrë Arta Marku u emërua në mënyrë të paligjshme nga Edi Rama në krye të Prokurorisë dhe, duke goditur prokurorët e të dy dosjeve, e realizoi qëllimin brenda 9 muajsh. Opinioni publik u njoh ditën e djeshme me padinë e Partisë Demokratike ndaj Kryeprokurores që, në shpërdorim të detyrës, i shërbeu Edi Ramës dhe krimit, për dështimin e hetimeve ndaj Saimir Tahirit”, ka thënë demokrati. Sipas Alibeajt dhe transferimi i prokurorëve të Krimeve të Rënda, Besim Hajdarmataj dhe Elisabeta Imeraj është bërë pasi u firmos urdhri i sekuestros së pronave të bandës së Habilajve. “Mediat kanë sjellë prova që faktojnë se, pasi largoi Elisabeta Imerajn nga çështja Tahiri, Arta Marku, largoi nga Prokuroria e Krimeve të Rënda edhe Besim Hajdarmatën, në të njëjtën ditë që u kërkua sekuestrimi i pasurive miliona euroshe të Habiljave dhe i ‘ audit’ të famshëm të Saimir Tahirit, AA 003 GB, me të cilin Habiljat bënin trafik ndërkombëtar droge. Shpërdorimi i detyrës nga Arta Marku është një çështje që kërkon hetim të shpejtë nga Prokuroria e Tiranës për të mos lejuar shkatërrimin e mëtejshëm të çështjeve Tahiri, Shullazi apo ndonjë dosjeje tjetër, për të cilën është shqetësuar Edi Rama”, tha dje demokrati.
HETIMI Në emër të PD- së, Alibeaj ka kërkuar që të hetohen lidhjet dhe komunikimet e Kryeprokurores, Arta Marku, me sekretarin e Përgjithshëm të Kryeministrisë, Engjell Agaçi, ministrin e Brendshëm, Fatmir Xahfaj dhe me socialistët Emonela Felaj dhe Ulsi Manja. “Partia Demokratike i bën thirrje Prokurorisë së Tiranës të urdhërojë pa vonesë pezullimin nga detyra të Arta Markut dhe të nisë hetimin ndaj saj. Është po kaq urgjente nevoja për të verifikuar: Cilat janë lidhjet direkte apo indirekte të Arta Markut me Edi Ramën. Çfarë komunikimesh ka Arta Marku me Engjëll Agaçin dhe si kanë ndikuar ato në shkatërrimin e hetimeve për ‘ Tahirin’ dhe zvarritjen e çështjes ‘ Shullazi’. Çfarë i kanë kërkuar Kryeprokurores Fatmir Xhafaj, Ulsi Manja, Ermonela Felaj apo ndonjë deputet tjetër socialist.
Hetimet duhet të qartësojnë a ka pasur Kryeprokurorja kontakte me avokatët apo të dërguar të Emiljano Shullazit. Gjithashtu, është po aq e rëndësishme të hetohet me shpejtësi baza ligjore për çdo emërim, lëvizje, transferim në Prokurori, që nga koha kur në krye të saj është Arta Marku. Hetimi pa vonesë për padinë penale të opozitës dhe pezullimi i Arta Markut nga detyra është shërbimi më i madh që prokurorët e ndershëm mund t’i bëjnë drejtësisë, duke mos lejuar që një Kryeprokurore e Përkohshme, shërbëtore e krimit, t’i bëjë Shqipërisë një dëm të përhershëm”, tha dje Alibeaj.