Delawie: SHBA s’do pranojë gjithçka nga marrëveshja
Pakti Kosovë- Serbi, Veseli: S’do lejojmë ndryshim kufijsh
Para largimit të tij nga Kosova, ambasadori amerikan Greg Delawie, i cili mbaroi mandatin e tij, e ka qartësuar qëndrimin e SHBA në lidhje me dialogun Kosovë- Serbi.
Edhe pse SHBA është shprehur pro heqjes së tabuve të kufijve, pra, i ka lënë të lirë Thaçin dhe Vuçiçin të diskutojnë për këmbimin e kufijve, ai është shprehur se SHBA nuk do të pranojë çfarëdo zgjidhje që del nga dialogu. Mediat në Kosovë citojnë Presidentin, Hashim Thaçi, të thotë se ka përkrahjen e plotë të SHBA- së për arritjen e një marrëveshje për korrigjimin e kufijve. Por, ambasadori amerikan në Kosovë, Delawie, duke iu referuar një marrëveshjeje të mundshme mes vendeve, ka thënë se SHBA nuk pranon gjithçka që del nga dialogu. Në një intervistë për “Koha Ditore”, ai theksoi se Shtetet e Bashkuara kërkojnë që marrëveshja mes Kosovës e Serbisë të burojë nga dialogu, por nuk do të pranojnë gjithçka që arrihet aty. “Ne nuk kemi thënë se do të pranojmë gjithçka. Ne kemi thënë se do ta shqyrtojmë zgjidhjen e propozuar dhe se do të shprehim shqetësimet tona nëse do t’i kemi. Zgjidhja duhet të jetë e qëndrueshme, e pranuar nga qytetarët e dy vendeve, duhet t’i kontribuojë stabilitetit të rajonit dhe jo të dobësojë stabilitetin”, ka thënë Delawie. Gjatë javës, ambasadorja amerikane në Kombet e Bashkuara, Nikki Haley, ka thënë se SHBA- ja nuk ka ndryshuar pozicion ndaj Kosovës. Ajo e ka quajtur zë individual brenda administratës deklaratën e Këshilltarit për Siguri Kombëtare, John Bolton, i cili kishte thënë se nëse palët arrijnë marrëveshje, SHBA nuk përjashton rregullimin territorial. Ideja e korrigjimit të kufijve kërkohet me shumë ngulm nga Presidenti i Kosovës, Hashim Thaçi. Ai kërkon të përfshijë Luginën e Preshevës, që tashmë ndodhet brenda territorit të Serbisë, në territorin e Kosovës, teorikisht pa dhënë asgjë për Serbinë. Por, të gjithë besojnë se kjo do të shkojë drejt shkëputjes së Veriut të Kosovës dhe marrjen e Liqenit të Ujmanit dhe minierës së Trepcës nga Serbia. Për këtë, Beogradi po lobon dhe lufton fort.
Situata politike në Kosovë nuk është aspak në favor të Presidentit Thaçi. Të gjitha palët politike, përfshirë edhe kreut të PDK- së që dikur drejtohej prej tij, janë kundër idesë që Thaçi ka “pranuar” nga Serbia, pra, këmbimit të territoreve. Ndërkohë që Vetëvendosje po përgatitet për një protestë masive kundër Thaçit, ku do të marrin pjesë edhe komunitete të tjera si boshnjakët, Kryetari i Kuvendit të Kosovës, njëkohësisht kreu i PDK- së, Kadri Veseli, ka folur për mediat gjermane rreth dialogut me Serbinë dhe qëndrimit të tij për zgjidhjen finale të mundshme. Veseli ka thënë se nuk do të ketë ndarje dhe shkëmbim territoresh dhe në asnjë mënyrë Asociacion të Komunave Serbe me kompetenca ekzekutive. “Nuk do të ketë ndarje dhe nuk do të ketë asociacion të me pushtet ekzekutiv”, ka deklaruar Veseli. Sa për idenë e bashkimit të Luginës së Preshevës me Kosovën, Veseli është shprehur kundër. Ai beson se për shqiptarët e Luginës zgjidhja më e mirë do të ishte që të kërkonin të drejta më të mëdha. “Serbia, si një vend i pavarur, duhet të bëjë më shumë përpjekje për të respektuar komunitetin shqiptar atje”, theksoi ai për mediat gjermane. “Do të punojmë edhe më shumë për të integruar komunitetet tona, serbët dhe komunitetet tjera. Ndarja nuk është një opsion për Kosovën. Ne duam të integrohemi në komunitetin europian dhe në NATO, dhe në këtë kuptim roli gjerman është shumë i rëndësishëm për ne si Kosovë”, ka nënvizuar me tej Veseli, duke qenë në një linjë me qëndrimin e Kancelares gjermane, Angela Merkel, kundër ndryshimit të kufijve në Ballkan.