Sherri për pronën, 61- vjeçari masakron kunatën
Qefsere Koleci u dhunua barbarisht nga kunati dhe dy djemtë e tij, si rrjedhojë e përshkallëzimit të konfliktit për rrugën e bllokuar. Me plagë të shumta në gjymtyrë, trup dhe kokë ajo ndodhet e shtruar në Spitalin e Traumës në kryeqytet, nga ku i bën apel Prokurores së Përgjithshme të ndërhyjë për zbardhjen e ngjarjes. Në të kundërt, ajo thotë se do të përsëritet masakra e Selenicës, ku mbetën të vrarë 8 pjesëtarë të një familjeje. “Kemi një konflikt për një rrugë, e cila është pronë shtetërore që i përket fondit pyjor. Komisioni i Ndarjes së Tokës, me Ligjin 7501, ma ka lënë aty rrugën. Pas 23 vitesh, zotëria ma ka bllokuar. Kam kërkuar ndihmë në të gjitha institucionet, të gjitha më kanë thënë që kam të drejtë, por drejtësia nuk doli”, shprehet 55- vjeçarja nga spitali. Qefsere Koleci tregon më tej se pas shkuljes së ullinjve të mbjellë nga kunati, nga ana e IKMT- ut, për të mundësuar hapjen e rrugës, ai është hakmarrë. Por, ajo thekson se kjo nuk është përplasja e parë mes dy familjeve, pasi edhe në raste të kaluara Medi Koleci dhe djemtë e tij ia kanë dhunuar fëmijët disa herë. Për këtë arsye, ajo thotë se nëse nuk ndërhyhet për zgjidhjen e situatës, mund të kemi përsëritje të një masakre të ndodhur vetëm pak kohë më parë në Selenicë. “Më datën 22 shtator, me urdhër të drejtorit të IKMT- ut, Ardian Halili, me ndihmën e Policisë së Shtetit, kanë ardhur dhe kanë hapur rrugën, por zotëria përsëri e ka mbyllur. E ka marrë Policia dje, e ka dërguar në Prokurorinë e Durrësit dhe e ka mbajtur gjithë ditën. Natën e ka liruar prokurori i Durrësit, po nuk e di se cili prokuror. Kjo është dhunë në familje, më janë masakruar fëmijët disa herë. I kam dërguar letrat në Policinë e Durrësit, Policia i ka dërguar te Prokuroria, Prokuroria i ka mbyllur çështjet. I bëj thirrje Arta Markut, Kryeprokurores, të zbardhet çështja një orë e më parë, të mos ndodhë si masakra e Vlorës”, përfundon Qefsere Koleci.