PD: Kryeprokurorja po shantazhon e dekurajon prokurorët antimafia
Partia Demokratike ka apeluar që padia e opozitës për pezullimin nga detyra të Prokurores së Përgjithshme të Përkohshme, Arta Marku, të merret në shqyrtim menjëherë. Në një dalje për mediat, ish- ministri i Drejtësisë dhe këshilltari ligjor i PD- së, Gazment Bardhi, ka akuzuar Kryeprokuroren Marku se me urdhër të Kryeministrit Rama, po godet, dekurajon dhe shantazhon grupin e prokurorëve antimafia. "Lufta ndaj krimit të organizuar dhe korrupsionit ka marrë goditje të paprecedentë gjatë këtyre ditëve nga Arta Marku, Kryeprokurorja e Edi Ramës, që me veprime të qëllimshme dhe me paramendim, po godet, dekurajon dhe shantazhon grupin e prokurorëve antimafia. Transferimi i paligjshëm i 3 prokurorëve të Krimeve të Rënda dhe procedimi disiplinor për 10 prej tyre është pjesë e një skenari të urdhëruar nga Edi Rama, për të shantazhuar prokurorët që janë në betejë të përditshme me krimin e organizuar, pushtetarët e lidhur me të dhe qeveritarët e korruptuar. Sulmi ndaj prokurorëve të Krimeve të Rënda është pjesë e marrëveshjes së Edi Ramës me krimin e organizuar, që fuqizohet çdo ditë e më shumë, falë mbështetjes nga Qeveria", tha Bardhi. Sipas ish- ministrit të Drejtësisë, qëllimi i një ' marrëveshje' mes Kryeministrit Rama dhe Kryeprokurores Marku, është që drejtësia mos të funksionojë për bandat e lidhura me pushtetin. "Arta Marku është e vetëdijshme se pse është në atë pozicion në mënyrë krejtësisht të paligjshme dhe të imponuar nga Edi Rama: Që t'i mbyllë gojën asaj pjese të drejtësisë, që nuk ka frikë të luftojë krimin e organizuar të lidhur me pushtetin dhe korrupsionin e qeverisë së Edi Ramës! Mekanizimi i mbylljes së gojës së drejtësisë nga Arta Marku dhe lidhja shkak- pasojë që e vërteton atë gjendet në vendimet e Partisë Socialiste në Parlament. I njëjti grup individësh që kartonin e deputetit e përdorën për të penguar Prokurorinë që të arrestonte Saimir Tahirin, 54 ditë pas këtij akti, imponuan emërimin e paligjshëm të Arta Markut, që Prokuroria të mos kërkonte më arrestimin e Saimir Tahirit dhe të dështonte hetimet ndaj tij", sqaroi ish- ministri. Për demokratët, është emergjent hetimi pa vonesë për padinë penale të opozitës dhe pezullimi i Arta Markut nga detyra është shërbimi më i madh që prokurorët e ndershëm mund t'i bëjnë drejtësisë, duke mos lejuar që një Kryeprokurore e përkohshme, shërbëtore e krimit të organizuar, t'i bëjë Shqipërisë një dëm të përhershëm.