Kontroll blic në burgje, kapen thika e lëndë narkotike
Gjenden edhe 17 celularë, procedohen penalisht 13 persona
Drejtoria e Përgjithshme e Burgjeve dhe Shërbimi i Kontrollit të Brendshëm në Burgje ka zhvilluar një aksion blic të shtrirë në harkun kohor të tri javëve, duke gjetur objekte të ndaluara, si celularë, thika e lëndë narkotike.
Në përfundim të këtij kontrolli janë marrë masa administrative dhe janë proceduar penalisht 11 të dënuar, disa punonjës policie dhe për tre zyrtarë në Burgun e Drenovës dhe të Fushë- Krujës është marrë masa e pezullimit nga detyra. Sipas Drejtorisë së Përgjithshme të Burgjeve, nga kontrollet e rrufeshme, të dënuarit janë kapur me telefona celularë, mjete prerëse të improvizuara dhe lëndë narkotike. Objektet e mprehta ishin improvizuar me brisqe, shufra hekuri, lugë dhe më pas të mbështjella me objekte plastike. Burimet thonë se thika të tilla janë përgatitur nga vetë të dënuarit, por nuk mund të thuhet e njëjta gjë për celularët dhe drogën e gjetur gjatë kontrollit. Ka dyshime se për futjen e këtyre sendeve të palejuara mund të kenë ndihmuar edhe vetë punonjësit e Policisë nëpër burgje, bashkë me familjarët e të dënuarve. REZULTATET E KONTROLLIT Drejtoria e Përgjithshme e Burgjeve bëri të ditur se bazuar në këto kontrolle është arritur që gjatë një periudhë 3- javore, të kapen 17 telefona celularë, 6 karta sim dhe 9 aksesorë të tjerë telefonash celularë. Gjithashtu, janë sekuestruar edhe 135 doza lëndë narkotike e dyshuar kanabis sativa, si dhe 27 mjete prerëse të improvizuara nga të burgosurit. Për shkeljet e konstatuara janë marrë masa administrative për punonjësit përgjegjës të burgjeve. Konkretisht janë pezulluar nga detyra: shefi i Policisë në IEVP Drenovë të Korçës për thyerje të skemës së sigurisë; Një specialist i grupit të sigurisë në IEVP Drenovë të Korçës, për falsifikim dokumentesh; Një specialist trupe në IEVP Fushë- Krujë. Burimet thanë se janë proceduar penalisht gjithsej 13 persona: Një punonjës policie për veprat penale të "Shpërdorimit të detyrës" dhe "Futja e sendeve të ndaluara nga personi që ka për detyrë t'i ruajë ato"; Një punonjës policie për veprën penale të "Falsifikimit të dokumenteve"; 11 të dënuar dhe paraburgosur për veprën penale "Futja e sendeve të ndaluara"; Një familjar i të dënuarit për veprën penale "Futja e sendeve të ndaluara". Në bashkëpunim me Policinë e Shtetit janë referuar në organin e Prokurorisë 3 raste për veprën penale "Prodhim dhe shitje e lëndëve narkotike". "Forcimi i sigurisë në burgje është një nga shtyllat e reformës së thellë, që është ndërmarrë në sistemin penitenciar në vend dhe që po jep rezultate të mira në funksion të rritjes së standardeve të këtij sistemi. Inspektimet dhe kontrollet nga të dyja strukturat në bashkëpunim do të vijojnë në mënyrë intensive", njoftoi dje Drejtoria e Burgjeve.