Rusia, akuza ndaj Izraelit për vdekjen e 15 ushtarëve
Ministria ruse e Mbrojtjes ka fajësuar Izraelin për rrëzimin e avionit gjurmues me 15 anëtarë të ekuipazhit, që humbën jetën javën e kaluar, pasi ushtarakët izraelitë mohuan të kenë shtyrë në kurth avionin për t’u mbrojtur nga raketat siriane. Akuzuat nga ushtarakët më të lartë rusë kanë nisur që pas incidentit duke u zotuar për kundërpërgjigje, por Presidenti Vladimir Putin është përpjekur për të ulur tensionet deri në zbardhjen e ngjarjes, të cilën e quajti një aksident tragjik. Ministria ruse e Mbrojtjes ka vlerësuar se katër avionët luftarakë izraelitë F- 16 qëllimisht e kanë shtyrë avionin gjurmues rus në koordinatat ku po qëlloheshin raketa nga mbrojtja raketore gjysmë- automatike tokë- ajër në Siri. Moska i hodhi poshtë deklaratat specifike të paraqitura personalisht nga komandanti i forcave ajrore të Izraelit mbi përgjegjësinë për avionin që u rrëzua në Siri. Incidenti kërcënon të minojë marrëdhëniet midis Rusisë dhe Izraelit, të cilat kanë balancuar në mënyrë delikate interesat e tyre kombëtare në konfliktin sirian me dëshirën për të shmangur një konflikt më të gjerë rajonal. Zëdhënësi i Ministrisë së Mbrojtjes të Rusisë, Igor Konashenkov, tha se “Informacioni objektiv tregon se veprimet e pilotëve izraelitë, të cilat çuan në vdekjen e 15 ushtarëve rusë, flasin për mungesë profesionalizmi ose për një neglizhencë minimale penale”. Izraeli ka mohuar se është përgjegjës për rrëzimin e avionit. Ushtria izraelite tha se shmangia e aksidenteve me forcat ruse mbetet një interes i përbashkët mes sfidave rajonale dhe se do të vazhdojë përpjekjet për të parandaluar Iranin që të vendoset në Siri dhe të ofrojë Hezbollahun me armë vdekjeprurëse.