Kompensimi, si ndahen 1.2 miliardë USD për pronarët
Këshilli i Europës ka miratuar skemën e ligjit të pronave. Sa ndikohet formula e kompensimit dhe premtimi i qeverisë për ndarjen e 1.2 miliardë USD
Kur kanë kaluar më shumë se dy vite nga miratimi i ligjit të ri të pronave, Komiteti i Ministrave të Këshillit të Europës ka dalë me një qëndrim zyrtar, duke e aprovuar skemën e re që ka nisur të aplikohet për kompensimin e pronave.
Në rezolutën e miratuar në 19 shtator, KiE pozicionohet në anën e Qeverisë Shqiptare, duke zhgënjyer pritshmëritë e pronarëve, të cilët besonin se mbështetjen e munguar këtu do të mund ta gjenin në Strasburg. Por ndryshe nga ç’mund të pritej, Këshilli i Europës vlerëson se Shqipëria i ka përmbushur detyrimet, duke hartuar një bazë të re ligjore funksionale dhe eficente. “Në këndvështrimin e Komitetit të Ministrave, Shqipëria i ka përmbushur të gjitha detyrimet sipas vendimit pilot të Manushaqe Putos, për ngritjen e mekanizmit efektiv të brendshëm për kompensimin e pronave të shpronësuara nga regjimi komunist. Nëpërmjet kësaj zgjidhjeje, Komiteti i Ministrave ka vendosur se, Shqipëria i ka dhënë fund mungesës së gjatë të një mekanizmi efektiv si dhe është vlerësuar mbështetja politike, financiare dhe teknike që është dhënë nga qeveria shqiptare që nga viti 2014 e në vazhdim”, thuhet në njoftimin e Ministrisë së Drejtësisë.
REZOLUTA Komiteti i Ministrave të Këshillit të Europës ka vënë në dukje angazhimin e qeverisë për të vënë në dispozicion 50 miliardë lekë në harkun e 10 viteve. Por përveç kësaj, janë edhe 99 miliardë lekë të tjera që vijnë nga vlerësimi financiar që i është bërë fondit fizik që Agjencia e Trajtimit të Pronave disponon. Pra, gjithsej, sipas rezolutës, janë 1.2 miliardë euro, që do të përdoren për t’i shkuar deri në fund këtij procesi. Por argumenti financiar nuk është i vetmi. Për KiE, me rëndësi është edhe qëndrimi që ka mbajtur Gjykata Kushtetuese dhe Komisioni i Venecias mbi këtë çësh- tje. “Mekanizmi i ri i kompensimit është vlerësuar gjithashtu pozitivisht nga Komisioni i Venecias dhe i pranuar nga Gjykata Kushtetuese e Shqipërisë”, thuhet në rezolutë. MINISTRIA E DREJTËSISË Pavarësisht se fjala e fundit i takon Gjykatës së Strasburgut, Ministria e Drejtësisë nuk ka vonuar për të përshëndetur vendimin e KiE- së, duke sjellë edhe një herë në vëmendje faktin se formula e re do të bëjë të mundur kompensimin e plotë të pronarëve brenda një afati 10- vjeçar. “Komiteti i Ministrave, ka vlerësuar në këtë proces të gjatë dhe të vështirë, bashkëpunimin e autoriteteve shqiptare dhe atyre të Këshillit të Europës në procesin e hartimit dhe zbatimit të mekanizmit të kompensimit të pronave. Në këtë mënyrë zgjidhim përfundimisht, pas 25 vjetësh, problemin e madh të kompensimit të pronave, duke pasur një formulë kompensimi për pronarët dhe një mekanizëm ligjor efektiv që lejon që pronarët të dëmshpërblehen, mekanizëm të pranuar dhe të certifikuar tashmë dhe me këtë vendim të Komitetit të Ministrave. Kompensimi i pronarëve tashmë është i garantuar dhe,, sipas përcaktimeve ligjore do të realizohet brenda afatit ligjor 10vjeçar. Tashmë, për qytetarët, të cilët prej vitesh kanë hasur ndryshime të shpeshta ligjore ose vendime të cilat nuk janë ekzekutuar, ka një mekanizëm efektiv i cili siguron ekzekutimin e të drejtës së tyre të njohur për kompensim”, mbyllet njoftimi. Janë rreth 400 padi të depozituara ndër vite pranë Gjykatës Ndërkombëtare për të Drejtat e Njeriut. Qëllimi i kahershëm i qeverisë shqiptare ka qenë kthimi pas i këtyre dosjeve për t’u gjykuar mbi bazën e legjislacionit shqiptar. Mbetet për t’u parë edhe qëndrimi që do të mbajë Strasburgu mbi këtë çështje për të parë edhe fatin që do të ketë ligji i ri.