Rama e quan PD- në maskë gjobëvënëse, Basha: Unë jam me njerëzit
Basha: Unë jam me njerëzit, propaganda e Ramës ka ndezur motorët për mbrojtjen e parave të "padronit dhe klientëve e tij"
Platforma e paraqitur nga Partia Demokratike për të sekuestruar asetet e kompanive që kanë fituar koncesionet në mënyrë abuzive, ka përplasur dje Kryeministrin Edi Rama me kreun e opozitës, Lulzim Basha.
Kreu i qeverisë e ka quajtur propozimin e Partisë Demokratike si një platformë dhune verbale mbi sipërmarrësit. Rama, në një mesazh në "Twitter" shkruan se opozita me këtë propozim ka marrë fundin si alternativë qeverisëse dhe është kthyer në një maskë gjobëvënëse. "Kur një parti politike shpall si platformë dhunën verbale mbi sipërmarrësit, ka ngatërruar sistemin ku vepron; ka harruar arsyen pse ekziston; ka marrë fund si alternativë qeverisëse e është kthyer në maskë gjobëvënëse! Kur këtë parti pastaj e drejton Lulzim Basha, ferra e ka marrë fare uratën", shkruan Edi Rama.
REPLIKA Përgjigjja e Lulzim Bashës nuk ka vonuar po nëpërmjet rrjetit social "Twitter". Kreu i opozitës shkruan se propaganda e qeverisë ka ndezur motorët dhe është në sulm për të hedhur poshtë propozimin e opozitës. Basha shkruan se të gjitha sulmet ndaj tij kanë për qëllim që të mbrojnë paratë e "padronit dhe klientët e tij". Për liderin e opozitës, hendeku midis oborrit të pushtetit dhe njerëzve të thjeshtë është thelluar dhe se ai është pozicionuar në krah të qytetarëve. "Propaganda e Ramës i ka ndezur të gjithë motorët. Shpifje e përbaltje nga shërbëtorët e mercenarët e Ramës për të mbrojtur pushtetin dhe paratë e padronit dhe klientëve të tij. Hendeku midis oborrit të Ramës dhe njerëzve të thjeshtë do të thellohet. Unë jam në anën e njerëzve!", shkruan Basha në "Twitter".
PROPOZIMI Dy ditë më parë, opozita paraqiti publikisht amendamentet e saj për ligjin antimafia, me anë të të cilit do të konfiskojë të gjitha asetet e oligarkëve që janë fituar në kundërshtim me ligjin. "Amendimi i ligjit antimafia, ku njësoj si me krimin e organizuar dhe me asetet e krimit të organizuar, të gjithë ata që përfitojnë në mënyrë korruptive, paratë e taksapaguesve shqiptarë do të jenë subjekt i të njëjtit mekanizëm, i cili konsiston në dy pjesë: Së pari, barra e provës do të jetë me subjektet e ligjit dhe jo me shtetin. Njësoj si me krimin e organizuar, do t'u takojë këtyre që janë bërë në këto afera korruptive të provojnë pafajësinë e tyre dhe ligjshmërinë e aseteve të tyre. Dhe së dyti, duke bërë të mundur që pavarësisht nga procesi penal- juridik, pasuritë e vëna në këtë mënyrë t'i nënshtrohen procesit të verifikimsekuestrim- konfiskim", është shprehur kreu i PD- së.