PS kritika për vetingun: Po mbroni gjyqtarë joprofesionistë
Hyseni: Po ikën sharmi i procesit, ikin gjyqtarë që nuk justifikojnë dot 700 mijë, kemi pasur ekonomi informale
Deputeti i Partisë Socialiste, Alket Hyseni, shprehet kundër mënyrës sesi po bëhet rivlerësimi i gjyqtarëve dhe prokurorëve nga Komisioni i Pavarur i Kualifikimit.
Sipas deputetit të Komisioni të Ligjeve, komisioni po heq gjyqtarë dhe prokurorë nga sistemi i drejtësisë, duke u bazuar vetëm në komponentin ekonomik dhe jo duke u bazuar në kriteret profesionale dhe integriteti i përfaqësuesve të gjyqësorit. Hyseni theksoi se në kushtet e një ekonomie informale që Shqipëria ka pasur, pamundësia për të justifikuar çdo pasuri të gjyqtarëve dhe prokurorëve mund të jetë e justifikueshme. Ndërkohë, sipas tij, në sistemin e drejtësisë ka gjyqtarë, të cilëve u janë rrëzuar mbi 50% e vendimeve në Gjykatat e Apelit apo Gjykatën e Lartë. “Këto institucione kanë harruar që kanë tre komponentë vlerësimi në punën e tyre, që është komponenti profesional, por edhe pastërtia e figurës dhe janë futur në një proces teknik të verifikimit pasuror duke e shndërruar procesin thjesht në një strukturë të re të verifikimit të pasurisë. Pra, kemi ILDKPI- në dhe tashmë po dalim në një strukturë të re dhe mendoj që po i çalon procesi. Shqiptarët mund ta justifikojnë moralisht një gjyqtar nëse nuk i gjen dot faturat për disa të ardhura, por nëse ju i thoni se ai gjyqtar ka gabuar mbi 50% të vendimeve, aty do e kuptojnë se ai është i paaftë profesionalisht”, deklaroi Hyseni. Reagimi i Hysenit erdhi menjëherë pasi Komisioni i Ligjeve miratoi kërkesat e Komisionit të Pavarur të Kualifikimit dhe Kolegjit të Posaçëm të Apelimit për shtimin me 12 këshilltarë ekonomikë. Në total, Komisioni i Ligjeve miratoi shtesën me 24 punonjës të rinj për tri organet kryesore që po realizojnë rivlerësimin e gjyqtarëve dhe prokurorëve. Komisionit të Pavarur të Kualifikimit iu miratua kërkesa për të marrë 8 këshilltarë ekonomikë, 2 përkthyes, 1 specialist protokoll arkive dhe 1 pastruese.