Presidenti Meta, në samitin e Donald Trump për betejën globale kundër drogës
"Mbështetje e plotë për iniciativën e Presidentit Trump. Angazhim për të bashkëpunuar ngushtë në çrrënjosjen e drogës”
Presidenti i Republikës, Ilir Meta, mbështeti dje iniciativën e Presidentit amerikan Donald Trump për luftën globale kundër drogës.
Kreu i shtetit shqiptar mori pjesë dje në Samitin e thirrur nga Presidenti i Shteteve të Bashkuara të Amerikës, Donald J. Trump, për problemet botërore të drogës. Përmes një statusi në "Twitter", kreu i shtetit shprehu qëndrimin e tij për këtë nismë. "Kënaqësi të ndjek Samitin e Presidentit të Shteteve të Bashkuara, Donald Trump. Mbështetje e plotë për iniciativën e tij për tëadresuar efektivisht problemin botëror të drogës. Angazhim për të bashkëpunuar ngushtë në çrrënjosjen e drogës dhe për tëmbrojtur të rinjtë e fëmijët nga ajo", ka shkruar Presidenti Meta në statusin e tij në "Twitter". Liderët pjesëmarrës në këtë samit miratuan një deklaratë të përbashkët të iniciuar nga Presidenti Trump, me titull: "Thirrje Globale për Veprime mbi Problemet Botërore të Drogës". Sipas këtij dokumenti, liderët pjesëmarrës në samit rikonfirmuan angazhimin e përbashkët për të adresuar dhe luftuar me më shumë efektivitet problemin botëror të drogës, si dhe për të zbatuar konventat për narkotikët e substancat psikotrope dhe të krimit të organizuar transnacional. Në mënyrë të veçantë, liderët u zotuan që të zhvillojnë plane veprimi kombëtare për të ndërgjegjësuar njerëzit dhe parandaluar abuzimin me drogën, si dhe forcimin e bashkëpunimit ndërkombëtar në sektorët e drejtë- sisë, zbatimit të ligjit e të shëndetësisë. Dy ditë më parë, kreu i shtetit shqiptar mori pjesë dhe në Samitin e Paqes "Nelson Mandela", të mbajtur në Organizatën e Kombeve të Bashkuara. "Duke njohur e pranuar periudhën e viteve 2019- 2028 si dekadën e paqes të Nelson Mandelës, ne si shtete anëtare angazhohemi për të bërë më shumë përpjekje të përbashkëta, duke qenë së bashku përgjegjës ndaj vlerave dhe parimeve të kësaj Deklarate. Në Shqipëri ne kemi pasur "Mandelët" tanë, të cilët për dekada me radhë gjatë regjimit komunist janë përndjekur mizorisht e pa mëshirë dhe janë privuar nga liria për shkak të ideve dhe besimeve të tyre. Por ata mbijetuan për të na treguar dhe për të na inkurajuar që të jemi më tolerantë për besimet, fenë dhe etninë e njëri- tjetrit. Ne duhet të luftojmë dhe të veprojmë së bashku për këto vlera", u shpreh gjatë fjalës së tij Presidenti i Republikës.