Rikonstruktohet Kopshti nr. 18, Veliaj: Kemi rritur cilësinë
Kopshtet publike në Ti- ranë, sipas kryetarit të bashkisë, Erion Veliaj, kanë rritur cilësinë e shërbimit për fëmijët. Në Kopshtin numër 18, në Njësinë Administrative Nr. 2, nga ku pa mjediset e rikonstruktuara, kryebashkiaku nënvizoi se përpos ambientit që do të jetë bashkëkohor, kopshti i ri ofron kapacitet më të lartë, duke ulur ngarkesën në kopshtet e zonës përreth. “Jam shumë entuziast sot që hapet ‘ Kopshti 18’, një kopsht jashtëzakonisht i rëndësishëm për mua, sepse dikur ka qenë edhe kopshti im. Jam shumë i lumtur që kopshti jo vetëm është rregulluar, por i janë shtuar hapësirat me disa dhjetëra metra katrorë. Do të thotë që kemi shtuar grupet, kemi kaluar nga një kopsht me 150 fëmijë, në një kopsht që tani ka thuajse 300 fëmijë”, deklaroi Veliaj. Me investimet e realizuara, kryetari i bashkisë thekson se kopshtet publike ofrojnë kushte më të mira dhe këtë, sipas tij, e provon kërkesa e lartë e prindërve për të regjistruar fëmijët. “E di që këmbëngulja e prindërve për t’i çuar fëmijët në kop- shtet publike është shumë e madhe. Për ne është kompliment. Do të thotë se kopshtet publike e kanë rritur aq shumë cilësinë, saqë për një vend në kopshtet publike kemi një pafundësi kërkesash. Megjithatë, duke qenë se kopshtet, edhe në administrim do t’i kalojnë Bashkisë së Tiranës, pra, jo vetëm si ndërtim, por edhe si furnizim, besoj që edhe ne do të përgatitemi që të përballojmë më mirë nevojat që ka Tirana”. Kreu i bashkisë dha lajmin e mirë se në kushte më të mira do të mësojnë edhe nxënësit e shkollës “Mihal Grameno”. Godina ka nisur të rikonstruktohet dhe pritet të jetë gati vitin që vjen. “E kemi filluar këtu mbrapa me një çerdhe të re, pastaj fëmijët rriten dhe vijnë në një kopsht të ri, e pasi mbarojnë ciklin në kopshtin e ri, mund të shkojnë te shkolla ‘ Kosova’ ose te shkolla ‘ Mihal Grameno’, që sapo ka filluar rikonstruksioni dhe do jetë gati vitin tjetër. Eksperienca në Tiranë do të jetë një eksperiencë ideale për fëmijët, diçka që e mbajnë mend tërë jetën dhe që i ka formuar ata si njerëz të shkëlqyer”, deklaroi Veliaj. “Kopshti 18” ndodhet në Rr. “Mihal Grameno” dhe godina e tij ishte plotësisht e amortizuar. Me investimin e Bashkisë së Tiranës është ndërtuar edhe një shtesë, që do të bëjë të mundur akomodimin e dy grupeve të reja fëmijësh.