Plani i masave të Policisë, 5 në pranga për krime të ndryshme
Gjenden ilaçe pa pullë, në kërkim pronari i një farmacie
TIRANE - Policia e Tiranës ka vijuar kontrollet në zbatim të planit të masave për kontrollin e territorit të ambienteve dhe banesave ku dyshohet për armë e lëndë narkotike, për kapjen e personave në kërkim, të atyre që qarkullojnë me armë zjarri pa leje apo që tentojnë të shpërndajnë lëndë narkotike. Kontrollet janë kryer nga Sektori i Forcës së Posaçme të Operacioneve Speciale dhe Kërkimit, Forca e Posaçme “Shqiponja” dhe Patrullat e Përgjithshme të Komisariateve. Gjatë kontrolleve të ushtruara është goditur një rast i kontrabandës së medikamenteve mjekësore, dy raste të prodhimit dhe shitjes së lëndës narkotike, një rast i prodhimit dhe mbajtjes pa leje të armëve dhe municionit luftarak si dhe kapet një shtetas në kërkim. Policia tha se ka verifikuar dhe kontrolluar 79 persona dhe 22 mjete. Strukturat e Drejtorisë Vendore të Policisë Tiranë, në zbatim të planit të masave për kontrollin e territorit të ambienteve dhe banesave ku dyshohet për armë e lëndë narkotike, për kapjen e personave në kërkim, të atyre që qarkullojnë me armë zjarri pa leje apo që tentojnë të shpërndajnë lëndë narkotike, gjatë orëve të para të mëngjesit të sotëm kanë ushtruar kontrolle me pika të lëvizshme, në të gjitha rrugët e Tiranës. Si rezultat i kontrolleve të ushtruara në rrugën e “Barrikadave” nga specialistët për Hetimin e Krimit Ekonomik dhe Financiar u bë arrestimi në flagrancë për kontrabandë medikamentesh mjekësore i shtetasit Arion Lleshi, 22 vjeç. Arrestimi i tij u krye, pasi gjatë kontrollit në ushtruar në automjetin e tij tip “Seat” iu gjetën 40 lloje të ndryshme medikamentesh mjekësore, të cilat ishin pa pullë të Agjencisë Kombëtare të Kontrollit të Barnave, si dhe u shpall në kërkim bashkëpunëtori i tij, shtetasit L. Ll.. Në Babrru dhe në rrugën “Riza Cuka”, nga kontrollet e ushtruara nga specialistët për Hetimin e Narkotikëve u bë arrestimi në flagrancë për veprën penale “Prodhim dhe shitje lëndësh narkotike i dy shtetasve; Klajdi Pillati, 23 vjeç, pasi në Babrru iu gjet 8.8 gramë hashash; Igli Keçi, 19 vjeç, pasi në rrugën “Riza Cuka” iu gjet një gram hashash. Në Farkë u bë arrestimi në flagrancë i shtetasit Ahmet Mashollari, 50 vjeç, pasi gjatë kontrollit të ushtruar në banesë iu gjet dhe sekuestrua një armë zjarri, pushkë dhe një sasi fishekësh. Në rrugën “Mine Peza” u kap shtetasi i shpallur në kërkim për përndjekje, Mario Shalari, 25 vjeç, për të cilin Gjykata e Tiranës ka caktuar masën e sigurisë “Arrest me burg”.