PS shtyn për në dhjetor vetingun në politikë
Alibeaj: Propozimi u fut në kalendat greke, pse keni frikë? Bylykbashi: Venecia ka thënë tri herë ‘ Po’
Këshilli i Legjislacionit dhe Komisioni i Ligjeve rrëzoi kërkesën e Partisë Demokratike për të kaluar në mënyrë të përshpejtuar nismën për ndryshimin e Kushtetutës për të realizuar procesin e vetingut në politikë.
Përfaqësuesit e maxhorancës, vetëm me votat e tyre vendosën që nismën e firmosur nga deputetët e opozitës t’ia nisin fillimisht për dhënie mendimi Komisionit të Venecias, ndërkohë që do të zhvillohen diskutime me ekspertë ligjorë edhe në vendin tonë. Sipas kalendarit të miratuar nga PS- ja, nisma e opozitës për ndryshimin e Kushtetutës pritet të shkojë në seancë plenare jo më herët se muaji dhjetor. Në mbledhjen e Këshillit, nënkryetari i Grupit Parlamentar të PD- së, Enkelejd Alibeaj, kërkoi që ndryshimet kushtetuese të miratohen menjëherë në Parlament, duke e cilësuar të panevojshëm vendimin për ta çuar draftin në Venecia, për shkak se nisma është e njëjtë me atë të vetingut të gjyqtarëve dhe prokurorëve. “Të fillosh diskutimin sot dhe të përfundosh pas Krishtlindjeve, kjo do të thotë ta fusësh diskutimin në kalendat greke. Pse doni t’i fshiheni gjësë? Përse doni ta shtyni? Përse keni frikë nga vetingu në politikë? Standardi i vetingut të politikanëve është as më pak dhe as më shumë, vetingu i gjyqtarëve dhe prokurorëve. Është i njëjtë me vetingun e policëve dhe të gardistëve. Duhet t’ia bëjmë të qartë publikut se kush do ta bëjë vetingun e politikanëve. E kemi bërë të qartë, do të jenë profesionistë të fushës, me mbikëqyrje ndërkombëtare, jo nga politika. Sepse nuk ka sens, ashtu është tallje. Veting i besueshëm dhe profesional si vetingu i gjyqtarëve. Nuk ka nevojë të thërrasësh në mënyrë miqësore Komisionin e Venecias, pasi e ka thënë atë që mendon. Tri herë madje. Tani, pasi i caktuam ekspertët dhe relatorët, pas një jave ta mbyllim këtë procedurë dhe ta miratojmë një orë e më parë. Koha nuk pret”, tha Alibeaj.
KONSULTIMI Por kreu i Komisionit të Ligjeve, Ulsi Manja, e cilësoi si shumë të rëndësishme marrjen e opinionit të Komisionit të Venecias për propozimin e opozitës. Deputeti i PS- së solli në vëmendje edhe rastin kur deputeti Bylykbashi kishte kërkuar me insistim Venecian për ligjin e dekriminalizimit. “Është shumë e rëndësishme marrja e një opinioni miqësor nga Komisioni i Venecias. Kjo, edhe si një traditë e kon- soliduar e Kuvendit të Shqipërisë. Nuk e kuptoj këtë merakun e madh të opozitës për të mos e çuar këtë projekt kushtetues në Venecia për të marrë një opinion më të kualifikuar. E konsideroj qëndrim me dy standarde të opozitës. Kam dy procesverbale të Komisionit për Dekriminalizimin, të cilin e ka drejtuar kolegu Bylykbashi. Atje thoshte që nuk ka sens që një projekt kushtetues të mos shkojë në Venecia”, tha Manja. Për deputetin Oerd Bylykbashi, shpejtësinë e miratimit të nismës kushtetuese e përcakton evidentimi i emrave të politikanëve të lidhur me krimin. “Graviteti i çështjes i provuar me emra përcakton nevojën për të ecur shpejt, se është interes publik. Tri herë ka shkuar në Venecia, i kopsitur nga të gjitha krahët, quaje dekrimianlizim apo veting të krimit nga politika, njësoj është dhe i ka thënë tri herë ‘ Po’ parimit, procedurës dhe rezultatit”, sqaroi Bylykbashi. Me votë të socialistëve kaloi në Komision edhe kalendari i mbledhjeve konsultuese, që do të zhvillohen për ndryshimin e ligjit themeltar të shtetit përpara se ai të vijë në seancë plenare.