Rritet bonusi për bebet, nga 40 mijë deri në 120 mijë lekë
"Fëmija i dytë do të marrë 16- fish të bonusit, 800 mijë lekë dhe fëmija i tretë do të marrë 1 milionë e 200 mijë lekë"
Për çdo bebe që do të vijë në jetë, duke nisur nga 1 janari i vitit që vjen do të ketë një bonus prej 40 mijë lekësh të rinj.
Në kushtet kur numri i lindjeve ka rënë ndjeshëm, qeveria ka menduar t'i japë zgjidhje, duke shumëfishuar mbështetjen financiare. Edhe më e lartë do të jetë vlera e çekut për ato çifte që do sjellin në jetë fëmijën e dytë apo të tretë. Lajmin e dha Kryeministri Rama dje gjatë një komunikimi në rrjetet sociale. Teksa solli në vëmendje se ishte ai, në detyrën e kryebashkiakut që aplikoi për herë të parë bonusin, Rama tha se për bebet e dyta shpërblimi do të jetë 80 mijë lekë, ndërsa për bebet e treta 120 mijë lekë. "Në vitet 2000, unë pata lançuar si kryetar i Bashkisë së Tiranës ' Çekun e Bebes', 50 mijë lekë të vjetra, i cili u prit shumë mirë asokohe. Por mbeti aq sa ishte për shumë e shumë vite dhe jo vetëm kaq, por u kthye në një problem. Që nga 1 janari i vitit të ardhshëm, çdo fëmijë i parë i një çifti do të marri 8- fishin e bonusit, 400 mijë lekë. Fëmija i dytë do të marri 16- fish të bonusit, 800 mijë lekë dhe fëmija i tretë do të marrë 24fish të bonusit, 1 milionë e 200 mijë lekë", u shpreh Kryeministri. Disa orë më vonë pas lançimit të kësaj nisme, Rama iu dha përgjigje edhe pyetjeve se sa do të ishte bonusi për binjakët dhe trinjakët. Gjatë aktivitetit me të rinj në kryeqytet ai tha se për fëmijët binjakë bonusi do të llogaritet si të ishin fëmijë të dytë, pra, secili nga 80 mijë lekë. E njëjta gjë edhe për trinjakët, përkatësisht nga 120 mijë lekë për secilin.
SKEMA
Kjo nismë do të vihet në jetë duke filluar prej janarit 2019. E panjohur deri më tani mbetet skema për ndarjen e shpërblimit. Kryeministri la të nënkuptohej se nuk do të ishte pagesë e plotë, por e përshkallëzuar në harkun e një viti. Pra, familjet do të kenë mundësi ta marrin me këste. "Ne jemi në diskutime për mënyrën se si do të ndërtohet mekanizmi i dhënies së këtij bonusi të ri të bebes, që do të jetë e shkallëzuar përgjatë vitit si një financim shtesë për familjet. Si do të jetë e shkallëzuar, kjo është diçka që ne po e diskutojmë për të parë formulën më të mirë".
LEHTËSI PËR REGJISTRIMIN
Lehtësi parashikohen edhe për regjistrimin e foshnjave të porsalindura. "Ministria e Shëndetësisë po përgatitet për një ndryshim të rëndësishëm që, përmes inovacionit, çdo bebe që lind në maternitetet e Republikës së Shqipërisë do të regjistrohet aty e nuk do të jetë më e nevojshme për të bërë gjithë atë procedurë të komplikuar me gjendjen civile e të tjera. Do të regjistrohet aty e do të marrë menjëherë çekun për mirëseardhjen në jetë në bashkësinë tonë, si një ndihmë e drejtpërdrejtë për familjet", bëri të ditur kreu i qeverisë.