Basha: Krim monstruoz shtetëror, duhet dënim i rëndë
"Balla, një politikan bandit i zhytur në botën e krimit"
Kryetari i Partisë Demokratike, Lulzim Basha, e cilësoi krim shtetëror ngjarjen e ndodhur në muajin korrik në Stacionin Policor të Fushë- Krujës.
Në një deklaratë urgjente për mediat, Basha publikoi të plotë intervistën e gazetarit Basir Çollaku me nënkomisarin Emiljano Nuhu dhe kërkoi dënim të rëndë për krimin monstruoz që është kryer nga njerëz me pushtet politik. "Një vajzë e pambrojtur është dhunuar, përdhunuar, rrëmbyer dhe torturuar në mënyrë sistematike. Është një krim monstruoz që meriton dënimin më të rëndë. Mbi të gjitha, ky është një krim shtetëror, ndaj para drejtësisë duhet të dalë jo vetëm sadisti çnjerëzor Rexhep Rrahja, por edhe pushtetarët që i dhanë mbrojtjen shtetërore kriminelit: Rrahman Rrahja, Artur Bushi dhe Taulant Balla, ky i fundit një politikan bandit i zhytur në botën e krimit", deklaroi Basha. Kreu i PD- së deklaroi se para drejtësisë për krimin shtetëror, që kanë kryer, duhet të dalin edhe drejtuesit e Policisë dhe Prokurorisë, që braktisën ligjin dhe qytetaren dhe bënë plane për të eliminuar nënkomisarin Nuhu. Për Bashën, një krim i tillë nuk do të mund të realizohej, nëse personat në fjalë nuk do të kishin mbështetje politike. "Para drejtësisë duhet të dalin të gjithë drejtuesit e Policisë dhe të Prokurorisë që braktisën ligjin, detyrën dhe qytetaren e pafajshme, veçanërisht ata që përndoqën, larguan dhe kërcënuan dhe bënë plane për ta eliminuar nënkomisarin Emiljano Nuhu që u përpoq të luftonte krimin. Ky krim i rëndë kundër njeriut, i mundësuar dhe mbrojtur nga funksionarët më të lartë të shtetit është kambana e alarmit për të gjithë shoqërinë se tashmë jetët e çdokujt janë të rrezikuara nga kriminelët e rrugës që mbrohen nga kriminelët e shtetit", theksoi kreu i PD- së. Basha i ka bërë thirrje të gjithë qytetarëve dhe veçanërisht grave të mos heshtin, por të reagojnë përballë një ngjarjeje të tillë. Një apel të veçantë kreu i opozitës e kishte për komunitetin ndërkombëtar, të cilëve i ka kërkuar të mos heshtin përpara kriminalizimit të shtetit në Shqipëri. "U bëj thirrje të gjithë qytetarëve, veçanërisht grave dhe vajzave, që të mos heshtin, por të ngrenë zërin dhe të dënojnë ashpër këtë krim shtetëror ndaj një vajze të pambrojtur. Nëse nuk ngremë zërin të gjithë bashkë sot, krimi nuk do të kursejë asgjë, as pronën, as jetën dhe as të ardhmen e askujt. Vetëm forca e njerëzve të bashkuar mund ta mposhtë diktaturën e krimit. I bëj thirrje komunitetit ndërkombëtar që të mos mbyllin sytë sërish, por të shohin nivelin alarmant të kapjes së shtetit nga krimi i organizuar për të mos u bërë me heshtjen e tyre mundësuesit e kriminalizimit të shtetit. Heshtja dhe iluzionet e rreme mundësuan drogën dhe krimin në politikë, por sot kjo heshtje rrezikon të çojë në përplasje shoqërore: kur shtetin e kap krimi, qytetarëve u mbetet vetëm dhuna për të mbrojtur jetën dhe fëmijët e tyre", tha Basha.