“Pistoletën në kokë policit që pranoi kallëzimin”
Kryemadhi: Djali i deputetit përdhunoi një vajzë jetime
Kryetarja e Lëvizjes Socialiste për Integrim, Monika Kryemadhi, ka reaguar dje pas denoncimit të publikuar nga PD- ja për ngjarjen në Komisariatin e Fushë- Krujës. Kryemadhi e ka cilësuar atë si ngjarjen më të rëndë, ku ditën për diell deputetët e Partisë Socialiste i vendosin pistoletën në kokë komisarit të Policisë, i cili ka pranuar kallëzimin penal për përdhunim të një vajze të re nga djali i deputetit të PS- së. Për Kryemadhin, kjo është një ngjarje e rëndë dhe se është tentuar të fshihet ngjarja e rrëmbimit dhe përdhunimit të një vajzë jetime. "Besoj se e keni dëgjuar, por sot ka ndodhur një skandal tjetër i radhës. Një ish- oficer i Policisë Gjyqësore ka denoncuar se si ditën për diell, në mes të Komisariatit të Policisë në Fushë- Krujë, i është vendosur pistoleta në kokë për të mos pranuar kallëzimin e një vajze të re, jetime, e cila ishte dhunuar, rrëmbyer dhe përdhunuar nga djali i një deputeti. Kjo është shumë e rëndë", ka thënë kryetarja e LSI- së. Sipas Kryemadhit, për këtë po pret reagimin e shoqatave në mbrojtje të grave, të cilat marrin projekte nga Komisioni Europian dhe ambasadat e huaja. "Mezi po pres të shoh këto shoqatat në mbrojtje të grave, të cilat bëjnë projekte pafund dhe kanë marrë në zyrat e Komisionit Europian apo të ambasadave të huaja, mezi po pres të shoh ato personazhe publike që flasin nëpër televizione për dhunën ndaj grave, mezi po pres të shoh deklaratat e tyre në përkrahje të kësaj vajze, e cila është jetime, e ka të pamundur mbrojtjen e saj nga familjarët, që ka qenë viktimë e dhunës apo edhe e epsheve të një djali socialisti më të përkëdhelur seç duhet", tha dje Kryemadhi. Kryetarja e LSI- së ka ngritur alarmin për situatën në vend, ku sipas saj shteti është shndërruar në një bandë. Kryemadhi tha se është e tmerrshme që t'i vihet pistoleta në kokë efektivit të Policisë në prezencë të kryetarit të bashkisë dhe deputetit të PS- së.
"Dhe më e tmerrshmja është që pistoleta në kokë i vihet në prezencë të kryetarit të bashkisë dhe të një kolegut tonë deputet. Kjo nuk ka ku të rrijë më. Ky vend është kthyer në një bandë. Dhe njerëzit do të fillojnë të bëjnë vetëgjyqësi. Sot e bënë me një vajzë, e cila nuk ka të atin, por nesër ata do të fillojnë ta bëjnë me fëmijët tanë", tha dje Kryemadhi.