Meta merr pjesë në pritjen e Presidentit Trump në Nju Jork
“Partneritet i fortë strategjik mes Shqipërisë dhe SHBA”
Presidenti Ilir Meta mori pjesë dje në pritjen e organizuar nga Presidenti i SHBA- ve, Donald Trump.
Në adresën zyrtare në “Facebook”, kreu i shtetit ka postuar dhe foton me Presidentin e SHBA- ve Donald Trump dhe Zonjën e Parë, Melania Trump. “I kënaqur që mora pjesë në pritjen e Presidentit të SHBA, Donald Trump. Partneritet i fortë strategjik mes Shqipërisë dhe SHBA”, shprehet kreu i shtetit, Ilir Meta. Kreu i shtetit ndodhet në SHBA në sesionin e 73- të Asamblesë së OKB- së, që filloi ditën e martë. Gjatë kësaj vizite, kreu i shtetit ka zhvilluar disa takime me homologë dhe kryeministra të vendeve të ndryshëm. Presidenti i Republikës u takua në Nju Jork me Kryeministrin italian, Giuseppe Conte, me të cilin vlerësoi marrëdhëniet mes dy vendeve. “Kënaqësi të takoj dhe ta uroj Giuseppe Conte për marrjen e detyrës së Kryeministrit të Italisë. Marrëdhënie të shkëlqyera tradicionale e miqësore mes dy kombeve e vendeve tona. Mirënjohës për mbështetjen dhe asistencën shumëdimensionale italiane”, shkruan kreu i shtetit për këtë takim në “Facebook”. Në kuadër të pjesëmarrjes në punimet e Asamblesë së Përgjithshme të OKB- së në Nju- Jork, Presidenti Meta u takua me Mbretin e Mbretërisë Hashemite të Jordanisë, Abdullah II. Presidenti Meta vlerësoi marrëdhëniet shumë të mira midis dy vendeve, si dhe theksoi rëndësinë që këto marrëdhënie të marrin një hov të ri në të ardhmen. “Bashkëpunimi dypalësh, veçanërisht në fushën e sigurisë, por edhe interesi në rritje për të bashkëpunuar në aspektin ekonomik apo të shëndetësisë, janë fusha që duhet t’i nxisim e promovojmë më tej” është shprehur Presidenti Meta. Në mënyrë të veçantë, Meta vlerësoi angazhimin dhe rolin shumë të rëndësishëm që Mbreti Abdullah II dhe Jordania luajnë për paqen dhe sigurinë në rajonin e Lindjes së Mesme. Nga ana e tij, Mbreti Abdullah II e vlerësoi shumë bashkëpunimin me Shqipërinë dhe me kënaqësi pranoi ftesën e Presidentit Meta për të zhvilluar një vizitë zyrtare në Shqipëri. Gjatë punimeve të Asamblesë së Përgjithshme të Organizatës së Kombeve të Bashkuara, Presidenti Meta u takua me Presidentin e Republikës së Qipros, Nicos Anastasiades. Meta e falënderoi homologun qipriot për mbështetjen që ai personalisht dhe Qiproja u japin çeljes së negociatave të anëtarësimit të Shqipërisë në Bashkimin Europian. Gjithashtu, Presidenti Meta nënvizoi interesin për t’i forcuar më tej marrëdhëniet midis dy vendeve, veçanërisht në aspektin ekonomik dhe për t’u dhënë atyre më shumë rezultate substanciale. Nga ana e tij, Presidenti Anastasiades e siguroi Presidentin Meta për vijimin e mbështetjes së Shqipërisë në kuadër të BE- së, si dhe shprehu dëshirën për të shkëmbyer vizita në nivel Presidenti në dobi të forcimit të marrëdhënieve mes dy vendeve. Në mënyrë të veçantë, Presidenti Meta nënvizoi interesin për të bashkëpunuar ngushtë në kuadër të rajonit të euromesdheut dhe kontribuar së bashku për forcimin e paqes dhe stabilitetit në këtë rajon.