Investime në Sauk, Veliaj: Vëmendje e njëjtë në të gjitha zonat e qytetit
Një hapësirë që deri dje përdorej rëndom si parking makinash është transformuar në një shesh argëtimi e çlodhjeje. Bëhet fjalë për zonën që kufizohet nga rruga “Herman Gmeiner” dhe “Selim Brahja” në Sauk, ku bashkia e Tiranës ka investuar. Për kryebashkiakun Erion Veliaj, ky është një premtim i mbajtur. Tashmë është detyra e komunitetit që ta mirëmbajë atë. Tani duhet që t’i mbrojmë, të sigurohemi që nuk prishen, që kur të vijë stina e pemëve të mbjellim pemë, që të dalim të gjithë me 10ta. Është shumë e rëndësishme që Sauku i Vjetër jo vetëm të ketë lodra të mira, por të nxjerrë edhe çuna e goca që nesër do të jenë kryetarë bashkie, futbollistë, doktoresha, deputetë, që nesër do të bëjnë gjëra të mrekullueshme për qytetin e Tiranës. Ato që kemi bërë ne këto vite në Tiranë, brezi juaj t’i bëjë akoma më të bukura, akoma më të mira, për të gjithë kalamajtë”.
Përveç investimit në krijimin e këndit çlodhës, është realizuar sistemimi i kanaleve të ujërave të shiut, trotuaret, gjelbërimi, asfaltimi i rrugës e të tjera. Në fjalën e tij para banorëve, kreu i bashkisë nuk la pa përmendur faktin që administrata që drejton ka drejtuar sytë jo vetëm në qendër, por edhe në periferi, duke investuar njësoj. “Jam super i lumtur sot që kthehemi pas një viti, kemi qenë këtu me Kryeministrin Edi Rama për një takim dhe thamë se brenda një viti do ta rregullojmë këtë hapësirë. Sot, edhe Sauku i Vjetër i ngjan 35 këndeve të tjera të lo- drave që kemi bërë në gjithë Tiranën, për t’iu thënë të gjithë fëmijëve se nuk ka rëndësi ku e kemi shtëpinë, në Sauk të Vjetër, në Kombinat, në Bllok, në Allias, në Laprakë, në Kinostudio, por kushtet i kemi njësoj”, nënvizoi Veliaj. Investimi i radhës në Sauk sjell jo vetëm më shumë urbanizim, por dhe mundësi argëtimi për fëmijët dhe të moshuarit.