Haradinaj i kërkon ndihmë NATO- s për formimin e Ushtrisë
Zyrtarët e lartë të Kosovës e kanë shfrytëzuar vizitën e tyre në Nju Jork, edhe për takime të tjera të rëndësishme përveç atyre të organizuara me liderë të shumë të OKB- së. Krerët e shtetit të Kosovës kanë mbajtur një takim me sekretarin e përgjithshëm të NATO- së, Jens Stoltenberg, ku Kryeministri Ramush Haradinaj ka kërkuar që ai ta ndihmojë Kosovën në transformimin e Ushtrisë në FSK. “Roli i NATO- s në Kosovë ishte jetik për popullin tonë në kohë lufte, kontributi i së cilës vazhdon edhe në ditët e sotme. Objektivi ynë kryesor strategjik mbetet aplikimi i plotë i standardeve të Bashkimit Europian në rrugën tonë drejt procesit të integrimit në BE dhe përpjekjet për t’u bërë pjesë e Aleancës më të madhe të paqes e sigurisë në botë, NATOs”, u shpreh Haradinaj pas takimit me Stoltenberg në Nju Jork. Situata politike dhe e sigurisë në Kosovë dhe rajon, progresi i arritur në Kosovë, me theks të veçantë procesi i tranzicionit i Forcës së Sigurisë së Kosovës në Forca të Armatosura të Kosovës, si një forcë shumetnike, profesionale dhe sipas standardeve të NATO- s, ishin disa nga temat e këtij takimi. Haradinaj ka falënderuar sekretarin Stoltenberg për bashkëpunimin e NATO- s dhe mbështetjen e vazhdueshme. “Institucionet dhe populli i Kosovës e vlerësojnë lart rolin e NATO- s”, tha Kryeministri Haradinaj. Ndërsa Stoltenberg ka theksuar se NATO do të ofrojë përkrahjen e saj për Kosovën edhe në të ardhmen. Takimi u zhvillua në kuadër të vizitës zyrtare të Kryeministrit Haradinaj në Nju Jork, bashkë me Presidentin e Kosovës Hashim Thaçi dhe ambasadoren e Kosovës në SHBA, Vlora Çitaku.