Trump akuzon Kinën për ndërhyrje në zgjedhje, reagon ministri kinez
Presidenti Trump akuzoi të mërkurën Kinën se po përpiqet të ndërhyjë në zgjedhjet e nëntorit me qëllimin për të ulur mbështetjen e votuesve ndaj administratës amerikane, madje Presidenti Trump ka përdorur përcaktimin “administrata ime”. “Fatkeqësisht, kemi gjetur se Kina është përpjekur të ndërhyjë në 2018- n kundër administratës sime”, tha Presidenti ndërsa mbante fjalimin e tij në një takim të Këshillit të Sigurimit të Kombeve të Bashkuara. “Ata nuk duan që unë ose ne të fitojmë, sepse unë jam Presidenti i parë që sfidoj Kinën për tregtinë”, tha ai duke iu referuar një lufte tregtare me tarifat e importeve, me të cilën SHBA nuk ka përfshirë vetëm Kinën, por të gjitha vendet e botës, duke i akuzuar se kanë përfituar deri tani në kurriz të Shteteve të Bashkuara. Por Presidenti amerikan nuk ofroi prova për një pretendim të tillë. Kina dhe SHBA- të janë në një luftë tregtare, në lidhje me taksat, që kur Trump është zgjedhur President. Zgjedhjet afatmesme në Kongresin Amerikan pritet të mbahen më 6 nëntor dhe ndërhyrja në zgjedhje nuk do të ishte diçka e re, pasi tashmë prej dy vitesh po hetohet ndërhyrja e Rusisë në zgjedhjet presidenciale amerikane. Por Kina i ka hedhur poshtë akuzat për ndërhyrje në zgjedhjet parlamentare amerikane. Në Këshillin e Sigurimit, ministri kinez i Punëve të Jashtme, Wang Yi, tha se “Kina e ka respektuar gjithnjë parimin e mosndërhyrjes në çështjet e brendshme të një vendi tjetër”, deklaroi Yi duke shtuar se “Ne kundërshtojmë akuzat e ngritura kundër Kinës dhe u kërkojmë vendeve të tjera të respektojnë Kartën e Kombeve të Bashkuara dhe të mos ndërhyjnë në punët tona të brendshme”, theksoi kryediplomati i Kinës.